Netfrænkan tjáir sig

Ítalska dramað

2009-09-13T11:40:00.002Z

Í ágúst fékk ég hjálparbeiðni á sófagestasíðunni frá ítalskri konu sem hafði komið til landsins í boði gamallar vinkonu (hún er líka ítölsk) sem eins konar au pair í 3 vikur. Planið var að hún passaði börnin hennar þrjú svona 5 - 6 tíma á dag og gæti svo túristast þess á milli. Annað kom á daginn þegar hún var kominn til landsins og hún endaði í algjörri þrælavinnu 11 tíma á dag. Ekki var nóg með að hún þyrfti að passa börnin heldur stóð hún í stórhreingerningum upp á hvern dag því bæði var húsið alltaf fullt af sófagestum og gestum í Bed and Breakfast sem frúin rekur. Einn daginn eftir uppákomu milli þeirra að ítölskum sið fékk mín nóg og sendi út neyðarkall. Ég svaraði því og þannig fékk ég einn af mínum skrautlegu og skemmtilegu sófagestum í heimsókn :)
Hún mætti útkeyrð og vansvefta og næsta dag var hún orðin fárveik með hita og var rúmliggjandi í 3 daga. Frúin hringdi reglulega og reyndi að lokka hana til sín aftur án árangurs auðvitað. Hún leigir líka út heimilisbílana og þær höfðu verið búnar að ganga frá því að Vale og tveir aðrir Ítalir fengju bíl á leigu og stóð við það. Ekki leist mér nú á gripinn enda pústið ónýtt og hávaðinn eftir því. Upphófust nú hringingar og ítalskur æsingur og á endanum var bíllinn tekinn aftur og lappað upp á pústið áður en þau lögðu í hann hringinn í kringum landið og fóru fyrst suðurleiðina.
Þau komust á Mývatn en þá datt stýrið hreinlega af. Þar voru þau nú strandaglópar og Frúin sagði þetta ekki vera sitt mál, þau gætu bara skilið bílinn eftir þarna og sett lyklana í geymslu á hótelinu. Enn voru þrír dagar eftir af leigunni en hún þvertók fyrir að endurgreiða þeim þá daga.
Annar samferðamaður Vale er lögfræðingur sem skilur ekkert hvað lögfræðingar gera á Íslandi fyrst það eru ekki nema tvö til þrjú morð á ári hahhahahaha. Hann var að sjálfsögðu ekki sáttur við að fá ekki endurgreitt og eftir mörg símtöl og ítalskan æsing hafði hann það loks í gegn að fá þessa þrjá daga endurgreidda.
Nú var loks komið að því að Vale myndi yfirgefa þetta (að því að henni fannst) guðsvolaða land en nei þá tók nú ekki betra við. Daginn áður en hún átti flug fékk hún tölvupóst frá Iceland Express þar sem þeir tilkynntu að flugið hennar klukkan 7 morguninn eftir hefði verið fellt niður og hún væri bókuð klukkan 17 í staðinn. Þá fékk mín nú fyrst taugaáfall því hún átti bókað flug frá London til Bologna klukkan 15. Sú litla enska sem hún getur talað hvarf gjörsamlega og hún grét og barmaði sér svo ég tók það að mér að tala við British Airways til að reyna að fá breytt fluginu. Þeir voru afskaplega almennilegir þar og breyttu fluginu þar til morguninn eftir þrátt fyrir að búið væri að loka fyrir breytingar. Að vísu þurfti hún að borga ein 200 pund á milli því auðvitað voru bara dýrustu sætin eftir. Ég bauð henni að vera hjá mér í tvo daga í viðbót til að fá ódýrara far en í hysteríunni vildi hún bara komast frá þessu hræðilega landi strax. Þegar svo átti að borga mismuninn með kreditkorti þá reyndist hún bara vera með debetkort. Afgreiðslumaður British Airways heyrði viðbrögðin þegar ég útskýrði fyrir henni að hún gæti ekki borgað með því nema rafrænt og var svo elskulegur að bjóða henni að borga bara þegar hún kæmi á flugvöllinn í London.
Ekki er allt búið enn, ég ákvað að keyra hana á flugvöllinn til að vera viss um að hún kæmist örugglega úr landi því ef eitthvað kæmi upp á þá var hún nánast mállaus og hysterísk. Þegar við komum á völlinn þá sé ég að búið er að FLÝTA fluginu án þess að láta hana vita. Brottför var nú 16.20 í stað 17!!!! Eins gott ég var með henni! Á endanum komst hún svo úr landi og gisti á flugvellinum í Gatwick um nóttina og komst heilu og höldnu til Ítalíu daginn eftir.

Haustið í nánd

2009-08-30T11:52:00.002Z

Ingileif benti mér á að ekki hefðu allir gefist upp á því að kíkja hér inn og það gladdi mig mikið. Svo nú er sumarfríið búið hjá Netfrænkunni sem lofar að skrifa hér oftar. Eftir danska daga og austurferð lagðist ég í tveggja vikna pest og síðan hefur verið fullt hús af gestum eins og vanalega :) Eins og er eru tvær miðaldra sænskar frúr hjá mér á vegum sonar annarrar þeirra en hann er í sófaklúbbnum og bað mig fyrir þær. Þær eru afskaplega viðkunnanlegar og þægilegar konur sem reka saman fótaaðgerðastofu í Jönköping svo nú á ég heimboð í gestahúsið hennar Moniku og fótanudd- og snyrtingu hjá þeim ef ég fer í Svíþjóðarreisu. Í gærkvöldi buðu þær mér út að borða á Indian Mango sem er alveg frábær staður. Þær voru búnar að bjóða mér fyrr í vikunni en vildu ekki segja mér hvaða staður það væri því þær vildu koma mér á óvart. Mér fannst þetta ægilega spennandi og var búin að bíða spennt eftir þessu. Það var því mjög ánægjulegt þegar þær stoppuðu fyrir framan Indian Mango því ég hef einu sinni farið þangað áður og er mjög hrifin af þessum stað. Í dag eru þær í Gullfoss og Geysi ferð í glampandi sól og blankalogni og eru held ég bara afskaplega ánægðar með þessa Íslandsferð sína. Sonurinn sendi mér skilaboð áðan því enginn hefur heyrt í þeim frá því þær fóru síðasta mánudag og hann var greinilega orðinn áhyggjufullur hahahaha.
Ég er nýbúin að upplifa annað ítalskt drama sem ég get sett í bókina mina sem ég mun skrifa á efri árum um sófagestaævintýrin mín. Sú saga kemur hér fljótlega.

Danskir dagar

2009-07-11T08:19:00.005Z

Hersingin á Sægreifanum.
Freya úðaði í sig harðfisknum sem Danirnir voru ekkert sérlega spenntir fyrir. Henni þótti Hrefnukjötið líka gott :)

Það hafa svo sannarlega verið danskir dagar hér í Einholtinu síðustu vikuna. Sebastian og Miriam, danskir sófagestir, komu á sunnudagskvöld. Jakob mágur Sigurbjargar og Rasmus komu á mánudag. Á þriðjudagsmorgun fóru Sebastian og Miriam en þá komu Jósef og Ása tengdaforeldrar Sigurbjargar. Á miðvikudag komu Sigurbjörg, David og Freya og Carsten vinur þeirra með 10 ára dóttur sína Lærke þannig að þá nótt gistu 8 manns hjá mér og gekk bara vel. Svo heppilega vill til að Valur er úti á sjó svo ég tók herbergið hans traustataki og sendi Jakob, Rasmus og David þangað. Þeir höfðu það afskaplega notalegt í kjallaranum með tölvu, tónlist og sjónvarp og gátu fengið sér öl í friði hahahaha. Öll hersingin fór út að borða á miðvikudagskvöldið á Sægreifann sem sló heldur betur í gegn. Hvalkjötið þótti algjört lostæti og humarsúpan ekki síðri. Í dag fækkar í hópnum því foreldrar Davids og Jakob og Rasmus leggja af stað austur á bóginn. Ég ætla að keyra austur á morgun og tek Beth og Travis með. Svo hittumst við öll á Egilsstöðum í afmælismat hjá Kristínu systur á mánudagskvöldið. Þetta er búið að vera alveg rosalega gaman að hafa þau öll hérna og verið ótrúlega lítið mál þrátt fyrir lítið pláss.

Travis

2009-05-20T22:10:00.002Z

Ég gisti hjá Beth og Travis litla á laugardagskvöldið, vorum með Júróvisjón partý að sjálfsögðu. Hann er búinn að vera með magakveisu en er eitthvað að lagast. Er farinn að skreppa út í göngutúr og sefur eins og engill á eftir.

Starraflærnar eru byrjaðar að hrella mig. Það er sjálfsagt hreiður í þakrennunni beint fyrir ofan svefnherbergisgluggann minn. Ég get ómögulega sofið með lokaðan glugga sem þýðir að ég vakna útbitin á morgnana. Nú tek ég ofnæmistöflur fyrir svefninn og finn minna fyrir því.

Ég byrjaði að kenna í Keflavík í morgun. Er að kenna mánudaga - föstudaga frá 10 - 12 atvinnulausum útlendingum. Kláraði námskeiðið í Reykjavík í gær og við ákváðum að hafa útskriftina úti í góða veðrinu. Löbbuðum um miðbæinn eins og túristar. Þau grínuðust með að þau ættu eiginlega að haldast í hendur eins og leikskólakrakkar. Ég var auðvitað leiðsögumaðurinn og fræddi þau um hitt og þetta þar á meðal Alþingishúsið sem ekkert þeirra vissi hvar var. Við komum við í Ráðhúsinu og skoðuðum stóra kortið af Íslandi og sáum ljósmyndasýningu um íslenskt mannlíf, náttúru o.fl. Við enduðum svo í garðinum á kaffi Hressó og þar var þessi fína útskriftarathöfn með munnlegu prófi sem allir stóðust, misvel auðvitað. Þau gáfu mér blóm og hálsmen og eyrnalokka þessar elskur. Þetta var alveg einstaklega skemmtilegur hópur og ég er strax farin að sakna þeirra.

Ég var með tvo skemmtilega sófagesti frá Napólí sem fóru frá mér í morgun. Í dag er þýskur ljósmyndari hjá mér og á morgun kemur ung kanadísk kona sem er að fara á sumarnámskeið í íslensku í Háskólanum. Á föstudagskvöldið er planið svo að skreppa á tónleika með hjónum frá Kanada. Einn fyrrverandi nemendinn minn er í hljómsveitinni Esju sem er að spila þá um kvöldið. Sem sagt nóg að gera hjá mér þessa dagana. Á morgun ætla ég að kíkja á kaffihús með Kai (ljósmyndaranum) og líta svo aðeins við hjá Beth og Travis.

Heim á ný

2009-04-30T23:02:00.002Z

Loksins fékk Beth að fara heim af fæðingardeildinni í dag. Það gekk eitthvað erfiðlega að ná niður blóðþrýstingnum en á þriðjudag fékk hún ný blóðþrýstingslyf sem virðast virka betur. Hún var alveg búin að fá nóg eftir viku spítalamat og sjúkrarúm. Ekki slæmt að komast heim í rúmið sitt og matinn hennar Önnu Gerðar ;) Að öðru leyti hefur hún það fínt og skurðurinn grær vel. Sá litli dafnar prýðilega og var held ég bara ánægður að koma heim til sín. Fyrsta nóttin er að vísu ekki ennþá liðin. Ég kíkti aðeins við hjá þeim í kvöld og sníkti auðvitað mat hjá Önnu. Ég var að kenna í nágrenninu en það var að byrja nýtt námskeið hjá mér sem ég kenni frá 19 - 21. Svolítið strangir dagar framundan en þetta verður nú bara þar til viku af júní.
Ég er búin að vera bíllaus frá því fyrir páska en fékk loksins hjólalegu í gær. Aron ætlar að skipta um hana fyrir mig svo kannski fæ ég bílinn um helgina. Það hefur svo sem verið fínt að labba enda hefur mér ekki veitt af hreyfingunni og orkan aukist heilmikið en það tekur óskaplegan tíma að komast á milli staða og fyrst ég er byrjuð að kenna þetta kvöldnámskeið þá verð ég eiginlega að vera á bíl annars kemst ég aldrei í háttinn fyrir miðnætti.
Valur er úti á sjó núna og enn á nýjum bát, Sighvati GK. Hann er svo heppinn að skipstjórinn á Páli Jónssyni spurði hann hvort hann mætti ekki mæla með honum við aðra skipstjóra sem Valur sagði auðvitað sjálfsagt og það hefur sannarlega skilað sér. Þetta er annar skipstjórinn sem hringir í hann. Ennþá hefur hann bara fengið afleysingar enda ekki mörg pláss sem losna en hann er nokkuð öruggur um fast pláss á einhverjum af Vísisbátunum um leið og það losnar.

Fæðingarsagan

2009-04-24T11:19:00.003Z

Beth fékk verki klukkan 8 á miðvikudagskvöldið og um 11 voru þeir orðnir reglulegir með 7 mínútur á milli. Við ákváðum því að drífa okkur á spítalann í Hreiðrið en þar sem blóðþrýstingurinn var mjög hár vorum við sendar yfir á fæðingarganginn. Þar kom í ljós að útvíkkun var ennþá bara einn sem venjulega þýðir að konan er send aftur heim en blóðþrýstingshækkunin gerði það að verkum að það var ákveðið að hún færi ekki heim að svo stöddu. Hún fékk lyf til að lækka blóðþrýstinginn og verkjalyf til að ná að sofa. Hún var með stöðugar hríðir og um morguninn var útvíkkun komin í 3 en sá litli var orðinn þreyttur og búinn að hafa hægðir í legvatnið. Þá var ákveðið að sprengja belginn, við það hörðnuðu hríðirnar mikið og blóðþrýstingurinn hækkaði aftur verulega hjá Beth. Til þess að ná honum niður var ákveðið að hún fengi mænudeyfingu, þar sem það var frídagur voru færri á vakt svo hún þurfti að bíða þó nokkurn tíma áður en mænudeyfingin kom. Allan daginn var hún með harðar hríðar en leið betur út af mænudeyfingunni. Um fimmleytið voru þau bæði orðin mjög þreytt en útvíkkun var enn bara 4 svo það var ákveðið að taka hann með keisaraskurði. 17.40 kom hann svo loksins í heiminn og ég fékk hann í fangið og hélt á honum meðan verið var að ganga frá skurðinum. Ég grét að sjálfsögðu þvílíkt en sem betur fer var ég með grímuna svo horið var ekki út um allt hahahahaha og svo byrjaði hann á að pissa á mig sem er víst mikil blessun sagði Beth :D Hún fékk hann svo í fangið um leið og við vorum komnar út af skurðstofunni og lagði hann strax á brjóst sem hann var ægilega ánægður með :D Hún fær einhverja nýja verkjameðferð sem þýðir að hún fær líklega að fara heim eftir 2 til 3 daga og fær þá ljósmóður heim daglega. Anna Gerður kemur til hennar á laugardagskvöldið og verður í einhverja daga hjá henni Beth til mikillar gleði.

Lítill keisari kominn

2009-04-23T21:11:00.004Z

Ég grét og hann pissaði á mig þegar hann fæddist :D
Núna er ég alveg búin á því eftir að vaka í nærri 40 tíma svo ég læt myndina nægja að sinni. Sá stutti var rétt rúmar 12 merkur og 50 cm. Þeim heilsast vel en eru auðvitað bæði mjög þreytt, ekki síst Beth.

Útkallsæfing

2009-04-20T15:52:00.004Z

Beth hringdi í mig á laugardagsnóttina og var á leiðinni upp á spítala. Ég hentist í föt og heim til hennar og svo upp á spítala. Hún var tengd við síritann og þar sem hríðarnar voru nokkuð reglulegar þá leit allt út fyrir að sá stutti væri loksins að láta sjá sig. Við nánari athugun reyndist útvíkkun ekki vera nema 1 og smám saman dró úr verkjunum svo við vorum bara sendar heim aftur. Aðeins smáæfing greinilega. Ég var hjá henni allan daginn í gær og nótt og ætla að vera hjá henni þar til yfir lýkur. Skrapp í vinnuna í dag enda allt í rólegheitum hjá henni bara smá verkir sem vonandi þýða að útvíkkunin sé að mallast áfram.
Á sama tíma var ég með fjóra sófagesti, krakka frá Belgíu og Sviss sem eru í skiptinámi í Noregi. Ég skildi þau bara eftir heima og hitti þau smástund í morgun áður en þau fóru. Alveg indæliskrakkar sem skildu betur við sig en þau komu að íbúðinni. Svo teiknuðu þau voða sætt þakkarkort handa mér með sjálfsmyndum af sér :)
Bíllinn er ennþá bilaður svo ég fæ nóga hreyfingu þessa dagana. Er að kenna í Borgartúni á morgnana og labba þangað (bara svona 15 mínútur) klukkan 12 rölti ég til baka á Hlemm og tek strætó í Hafnarfjörðinn á skrifstofuna sem er á besta stað í miðbænum. Svo er það auðvitað strætó til baka að Klambratúni enda stutt að labba þaðan heim. Í morgun bættist við að ég þurfti fyrst að fara heim frá Beth áður en ég fór í Borgartúnið og svo að koma við heima áður en ég fór í Hafnarfjörðinn og það í þessu hífandi roki (og smá rigningu) sem er í dag.
Nú vona ég að sá stutti fari að láta sjá sig, hann átti að koma 18. apríl svo það hlýtur eitthvað að fara að gerast. Ég set inn mynd af honum við fyrsta tækifæri þegar hann er fæddur.

Vordísin komin :D

2009-04-05T14:12:00.003Z

Já hún kom með vorið til mín frá Danmörku :D Við fórum út að borða á Santa Maria í gærkvöldi og erum að hafa það huggulegt saman að dönskum sið í dag. Á morgun byrja ég svo í 8 - 4 vinnunni minni. Það verður skrítið að vera komin með eigin skrifstofu og reglulegan vinnutíma eftir óreglu síðustu 7 ára. Staðsetningin er alveg frábær í miðbæ Hafnarfjarðar og húsið gamalt og kósý. Strax eftir páska byrja ég svo að kenna atvinnulausum útlendingum á vegum Vinnumálastofnunar.

Við Beth fórum til ljósmóðurinnar á föstudaginn og allt er klárt fyrir komu litla mannsins. Hann er búinn að skorða sig vel og getur komið hvenær sem er. Ég er að vona að hann drífi sig í heiminn um páskana og Beth er að sjálfsögðu farin að bíða með óþreyju enda kúlan orðin stór og fyrirferðamikil.

Ég á von á hefðarfrú mikilli frá Mexíkó í heimsókn næstu daga. Mamma hans Ricardo er í heimsókn á landinu og að sögn Tamöru tengdadótturinnar er hún með mikið hreinlætisbrjálæði og býr þar að auki í risavillu með þjónustufólk á hverjum fingri. Systir hennar kom með en hún er að bjóða sig fram sem borgarstjóri í borginni sem þau koma frá. Þær systur tala bara spænsku svo Ricardo verður að vera túlkur. Ég er að reyna að missa mig ekki alveg í að þrífa í hengla fyrir heimsókninna (eins og Tamara gerði), þær verða bara að lifa af rykið hjá mér hahahahaha. Ég vona bara að nágrannarnir verði á rólegu nótunum á meðan hehehehe

Á fæðingarvaktinni

2009-03-29T18:11:00.003Z

Ég er á fæðingarvaktinni þessa dagana. Verð líklegast viðstödd þegar strákurinn hennar Beth fæðist (áætlað 18. apríl) er nefnilega staðgengill Önnu Gerðar hérna í bænum. Að sjálfsögðu er ég farin að bíða eins og Beth og í nótt dreymdi mig að ég væri að gera allt klárt fyrir heimafæðingu, var að tína til hrein lök og sjóða vatn eins og í gamla daga hahahaha. Ég ætlaði sko að vera sjálf ljósmóðirin :) Ég hef tvisvar verið viðstödd fæðingar og hlakka mikið til. Það er svo stórkostlegt að upplifa lítið barn fæðast í heiminn :D Beth ætlar að stefna á Hreiðrið enda fær hún að vera þar í 24 tíma eftir fæðingu. Á fæðingardeildinni er manni víst hent út eftir 2 - 3 tíma ef allt er eðlilegt. Það hefur aldeilis breyst frá því ég átti Gunnar Björn á Fæðingarheimilinu, þá mátti ég ekki einu sinni stíga í fæturna fyrstu tvo dagana. Það má nú alveg fara milliveginn finnst mér.

Á uppleið

2009-03-25T13:07:00.002Z

Ég er búin að vera eins og hlýðinn hundur síðustu daga. Fer samviskusamlega í sund eða ræktina daglega og hringi í Hrönn á hverju kvöldi að gefa skýrslu. Fannst vissara að fá eitthvað aðhald til að hjálpa mér að komast í rútínu og bað því Hrönn að taka það að sér að fylgjast með mér. Ég finn strax smá mun á mér.
Í morgun var mér boðið 75% fast starf hjá Jafnréttishúsi í Hafnarfirði sem felst í því að halda utan um íslenskukennsluna. Ég byrja með íslenskunámskeið fyrir atvinnulausa útlendinga eftir páska og verð með tvo hópa. Það er sem sagt næg vinna framundan hjá mér og þá skiptir máli að halda dampinum í hreyfingunni svo ég hafi nú orku í allt þetta. Ég er samt ekkert hætt við doktorsnámið en fresta því kannski eitthvað.

Endurhæfing

2009-03-22T14:45:00.002Z

Ég er komin í markvissa endurhæfingu til að komast yfir síþreytuna. Fór til læknis í vikunni sem sagði ekkert annað duga ef ég ætti að ná mér aftur, þetta væri einskonar andleg þreyta í kjölfar taugaáfallsins sem ég fékk fyrir nærri tveimur árum.Fólki gengi oft erfiðlega að ná sér aftur á strik þegar það lendir í þessu. Í gær var fyrsti dagur í endurhæfingu og byrjaði ég á því að fara í sund, rétt slefaði 200 metrana sem er hrikalegt miðað við hvað ég hef verið vön að synda. Kom svo við í Bónus á heimleiðinni og verslaði grænmeti. Bjó mér til þennan líka góða hummus með grænmetinu nammmmi. Sennilega var þetta meira að segja heldur mikið fyrir mig því ég lá alveg bakk það sem eftir var dags. Hefði alveg eins getað verið að ljúka maraþoni miðað við líðanina. Flökurt og með verki um allan skrokk, lá bara og hlustaði á tónlist allt kvöldið því ég gat hreinlega ekki reist höfuð frá kodda. Þegar mér tókst að safna kröftum til að skreiðast inn í rúm þá rotaðist ég næstu 12 tímana. Er á leiðinni í sund aftur en er að hugsa um að fara bara 150 metra til öryggis því ég er ennþá frekar búin á því eftir gærdaginn.
Kunningjakona mín sem á litla líkamsræktarstöð var svo yndisleg að gefa mér 10 tíma í bekkina sína og ætlar að hjálpa mér að komast yfir erfiðasta hjallann. Ég fæ nudd og alles hjá henni og hlakka til að fá sjálfa mig aftur til baka.

Góðir gestir

2009-03-17T14:21:00.002Z

Litli frændi hann Eldar Bóas kom í heimsókn með foreldrum sínum og Beth frænku. Að sjálfsögðu þurfti Beth að æfa sig aðeins áður en litli strákurinn hennar kemur í heiminn í apríl :D
Ég bakaði auðvitað pönnukökur í tilefni dagsins og sófagesturinn minn frá Bandaríkjunum tók vídeómynd af íslenskum pönnukökum til að sýna vinum sínum hvernig þær eru framreiddar.

Undur náttúrunnar

2009-03-08T17:50:00.003Z

Alveg er það nú ótrúlegt hvað íslenskar jurtir eru öflugar. Ég er með krónískar kinnholsbólgur sem hafa lengi verið að gera mér lífið leitt og gert það að verkum að ég vakna alltaf þreytt á morgnana sama hvað ég sef lengi. Ástæðan er kolstíflað nef og partur af morgunverkunum verið miklar snýtingar. Í vikunni fékk ég send þurrkuð vallhumalsblóm frá mömmu og bjó mér til te úr þeim fyrir svefninn. Þau stórkostlegu undur gerðust að í fyrsta skipti í marga mánuði og ja eiginlega mörg ár, vaknaði ég úthvíld og ekki vottur af nefstíflu!! Þvílíkur munur að geta andað alla nóttina og nú eru allar morgunsnýtingar úr sögunni. Ég hreinlega trúi þessu varla. Nú verður sko farið á stúfana í sumar og tíndir bílfarmar af þessum töfrablómum.
Félagslífið hefur verið með miklum blóma hjá mér þessa vikuna. Á fimmtudagskvöld var ég boðin út að borða með hópi tungumálakennara frá Belgíu, Finnlandi, Ítalíu og Svíþjóð ásamt gestgjöfum þeirra í Alþjóðahúsi. Sat svo fund með þeim allan föstudaginn um tungumálakennslu, þetta er eitthvað Grundtvig samstarf sem Alþjóðahús er hluti af. Í gærkvöldi buðu Ricardo og Tamara mér út að borða á Boston. Rosalega kósý staður á Laugaveginum, maturinn alveg meiriháttar góður, ódýr og vel útilátinn.
Ég keyrði Adriënne á flugvöllinn í morgun eftir ægilega notalegar tvær vikur hjá mér. Hún var samt farin að hlakka til að koma heim og undirbúa fæðingu barnsins og að fara í vorverkin í garðinum.
Valur kemur í land eldsnemma í fyrramálið og fer aftur út seinnipartinn. Ég vona að hann fái far í bæinn annars þarf ég að keyra til Grindavíkur klukkan sjö í fyrramálið.
Ég er með aukakennslu næstu tvær vikurnar og grunnskólafræðslu svo það verður nóg að gera hjá mér í mars. Þar að auki er fullbókað af sófagestum þennan mánuð.

Öppdeit

2009-03-01T22:16:00.002Z

Hummm ég er ekki alveg að standa mig í bloggskrifum.
Síðasta mánudag fór ég með fræðslu um fjölmenningu og fordóma í 9. bekk í fyrsta grunnskólanum af sjö. Það gekk bara nokkuð vel fannst mér, ég var með þrjá bekki í röð sem allir voru mjög ólíkir. Fyrsti var afskaplega "krefjandi" eins og kennararnir orðuðu það en mér fannst þau nú bara mjög skemmtileg þó þau væru ansi lífleg hahahaha. Adriënne vinkona mín er hjá mér núna og er að leiðbeina mér í sambandi við umsókn um doktorsnám og styrki í Danmörku. Ég finn að með hækkandi sól kemur aukin orka í mig og er bara orðin nokkuð spennt að takast á við þetta. Það var svo yndislegt veðrið í gær að ég fékk mér göngutúr í bæinn og kíkti í Kolaportið. Þar úði allt og grúði af fólki og varningi en ég lét mér nægja að kaupa fjallagrasaflatbrauð eins og venjulega þegar ég lít þarna inn.
Valur er að fara á sjóinn á þriðjudaginn, fékk afleysingatúr á þessum fína línubát frá Grindavík. Eitthvað annað en ryðdallurinn sem hann var á um daginn.

Ljóðaslamm Bríetar

2009-02-18T15:49:00.006Z

Skotta

Skotta hún er skrítið skott
skoppar mjög svo vel
hoppar, skoppar, glettir glott,
sér um að ég frjósi ekki í hel.

Skarlett

Skarlett hún er svört og smá
borðar hvað sem er
segir voða sjaldan mjá
enda gömul er.

Það er ekki amalegt að fá gesti í heimsókn sem þakka fyrir sig í bundnu máli :)Þær mæðgur Hrefna, Bríet og Rán brugðu sér af bæ og gistu hjá mér eina nótt.

Kreppurof?

2009-02-04T14:06:00.003Z

Dauðaþögn síðustu mánaða hefur verið rofin af LOFTPRESSU hér fyrir utan. Ég rauk á fætur og út í glugga til að athuga hvort svo ólíklega skyldi vilja til að framkvæmdir væru hafnar að nýju við stúdentagarðana hér hinum megin við götuna. Að sjálfsögðu reyndist svo ekki vera og þeir verða líklegast áfram fjarlægur framtíðardraumur. Mér sýnist þetta vera starfsmenn Reykjavíkurborgar að bauka við einhvern tittlingaskít, svona klukkutíma verk sjálfsagt sem enginn verður feitur af.
Valur fór á sjóinn í gær á "nýjan" bát. Ekki leist okkur á blikuna þegar við mættum á bryggjuna í Hafnarfirði. Annan eins ryðdall höfum við ekki séð ef frátaldir eru rússneskir togarar sem stundum hafa dagað uppi mánuðum saman einmitt í Hafnarfjarðarhöfn. Valur leit þó jákvæðum augum á þetta, hann gæti alltaf sagt barnabörnunum söguna af því þegar hann hér um árið var á honum Skafta, það var nú aldeilis skítadallur krakkar mínir!

Litli sófagesturinn minn

2009-02-04T12:26:00.002Z

Svona líka fyrirmyndar gestur, afskaplega skrafhreifin og brosmild lítil dama :D Ég hefði svo sannarlega verið til í að hafa hana lengur hjá mér en þær mæðgur tóku rútuna norður í morgun. Í kvöld kemur svo kona frá Japan til mín. Fyrsti Japaninn sem gistir hjá mér svo ég hlakka til. Þar að auki talar hún víst ekki mikla ensku hahahaha en ég er nú vön að tala við "mállaust" fólk ;)

Grátt eða blátt eða kannski ekki neitt

2009-02-01T21:40:00.003Z

Það má reikna með að gráu hárunum fjölgi verulega á höfðinu á mér á næstunni. Ég keypti að vísu lit í gær til að flikka upp á útlitið en varð heldur betur um þegar ég sá verðið. Síðast þegar ég keypti hárlit kostaði hann um 1100 kr en er núna á tæpar 2.600 kr !!! Daníel stakk upp á því að ég krúnurakaði mig bara og hver veit nema það verði næsta sparnaðaraðgerð hjá mér.
Í dag kom til mín yngsti sófagestur sem ég hef hýst og mun varla hýsa þá yngri. Þetta er lítil þriggja og hálfsmánaðargömul stelpa og algjört krútt. Mamma hennar er þýsk en pabbi hennar frá Gíneu. Hún er hérna með mömmu sinni sem hefur verið á Íslandi oftar en einu sinni og er núna á leiðinni norður á Sauðárkrók að heimsækja vinafólk. Þær mæðgur verða hjá mér í þrjár nætur og ég er himinlifandi yfir heimsókninni.
Valur tók sig til og gekk á Esjuna í gær. Hann týndi vettlingunum, húfunni, sólgleraugunum og batteríunum úr myndavélinni í ferðinni. Ég þakkaði bara fyrir að hann komst heilu og höldnu niður af fjallinu. Hann fer út á sjó á morgun á einhvern ísfisktogara úr Hafnarfirði.

Fastir liðir eins og venjulega

2009-01-28T14:05:00.004Z

Í gær byrjaði ég aftur að kenna. Er með tvö námskeið í röð frá 17 - 20.20 þrisvar í viku. Loksins segi ég nú bara, þetta er hreinlega skemmtilegasta starf sem ég hef unnið við og ég var full eftirvæntingar að byrja. Ég er búin að vera með einhverja undarlega pest í næstum tvær vikur en sem betur fer virðist hún vera að fjara út. Ennþá er ég ekki alveg laus frá háskólanum, þeir sem féllu hjá mér þar þurftu að skila aftur lokaskýrslum sem ég hef verið að fara yfir og þarf að skila af mér á föstudaginn. Nú verð ég að setjast niður og skrifa grein upp úr ritgerðinni minni á íslensku og ensku. Þessi pest setti strik í reikninginn en nú dugir ekki annað en að koma skipulagi á daglega lífið.
Ég held að veturinn sé kominn fyrir alvöru, það kyngir niður snjó og ég sé fram á tröppumokstur næstu daga.

Ný stefna

2009-01-20T20:49:00.002Z

Jæja þá er ég búin að taka ákvörðun um að sækja um doktorsnámið í Danmörku. Adriënne vinkona mín kemur í febrúar og verður hjá mér í 3 vikur, hún er með þetta allt á hreinu hvernig umsóknarferlið er svo ég fæ hana til að aðstoða mig. Svo er bara að krossa fingur og vona það besta. Ef ég kemst inn þá fæ ég laun frá skólanum sem eru víst bara ágæt (rosalaun í íslenskum krónum auðvitað).
Eins og nærri má geta þá hefur dregist saman í íslenskukennslunni en ég er þó víst með þrjú örugg námskeið hjá sama fyrirtækinu og ég hef verið að kenna hjá sl. ár. Fékk að vita þetta síðasta föstudag en er ekki byrjuð ennþá. Kannski eins gott því ég er búin að vera með einhverja lumbru í mér frá því á laugardag. Lét það þó ekki aftra mér frá því að heimsækja Amal upp á Akranes í gær og gisti hjá henni. Lærði nýja bráðholla uppskrift og að sjálfsögðu fljótlega og ódýra. Ég er bara að verða búin að viða að mér þó nokkrum slatta af arabískum uppskriftum frá henni og fæ að sjálfsögðu einkakennslu :) Gunnar Björn er svo notaður sem tilraunadýr þegar ég prufukeyri uppskriftirnar.

Ameríski mánuðurinn

2009-01-10T22:56:00.003Z

Ég kveikti á netsjónvarpi enska Aljazeera í kvöld til að horfa á fréttir frá Gaza. Þið getið ímyndað ykkur undrun mína að sjá Geir Haarde á skjánum!! Því miður var það ekki vegna þess að Ísland hefði slitið stjórnmálasambandi við Ísrael heldur var þáttur um fjármálakreppuna á Íslandi. Ég náði nú bara síðustu mínútunum en þetta virtist nokkuð ítarleg umfjöllun þar sem var m.a. rætt við Geir, Hörð Torfa, konu sem ég náði ekki nafninu á, Sverri Ólafsson og einn mann í viðbót. Þó nokkrar landslagsmyndir voru sýndar sem skila sér kannski í nokkrum túristum með fulla vasa af gjaldeyri. Talandi um túrista, það er heilmikil traffík á sófanum hjá mér þessa dagana og svo virðist sem janúar ætli að verða ameríski mánuðurinn því 4 af 5 eru Bandaríkjamenn.

Kreppuklipping

2009-01-04T23:35:00.001Z

Valur ákvað að spara sér 3.500 kall í klippingu og þeir Daníel hjálpuðust að við rúninguna á Gamlárskvöld og tókst bara vel upp. Ég býst við að gera það sama enda orðin vön því. Maður hefur nú sjaldan haft efni á þeim lúxus sem fátækur námsmaður enda er ég orðin bara nokkuð lúnkin við snyrta sjálf á mér hárið.

Tölvusnillingur

2008-12-31T00:03:00.003Z

Ég held ég sé að breytast í tölvusnilling. Ég er búin að taka tölvuna mína alveg í gegn og nú er hún farin að virka alveg ljómandi vel. Nú síðast lagaði ég hljóðið en það heyrðist varla orðið nokkuð hljóð frá henni. Msn-ið var horfið en Daníel benti mér á að sækja aMSN fyrir Linux og nú er ég loksins aftur komin í samband við umheiminn :) Ellen fannst nú ekkert skrítið að ég væri orðin tölvunörd miðað við tímann sem ég eyði við tölvuna hahahaha.
Nú er ég loksins að verða búin með allan yfirlestur á prófum og lokaskýrslum og er að ganga frá einkunnum. Þá má segja að ég sé formlega komin í jólafrí!
Gleðilegt nýtt ár öll sömul og njótið áramótanna en munið að ganga hægt um gleðinnar dyr!!

Nostalgía

2008-12-30T01:11:00.001Z

Eins og í "gamla" daga....allir að spila "Mario Bros" í einu hahahaha.

Bruni (BB)

2008-12-27T18:07:00.003Z

Ég er illa haldin í dag :( mér tókst að brenna mig á hægri úlnlið og handarbaki þegar ég var að hella mér upp á kaffi í dag. Að sjálfsögðu var atgangurinn svo mikill að kaffikorgurinn var út um allt gólf og skáphurðir. Ellen sagði að mér væri nær að fá mér ekki almennilega kaffivél í staðinn fyrir að sullast þetta á gamla mátann hahaha. Ég ætla nú samt að þrjóskast áfram við uppáhellinguna! Ég hafði það af að skúra eldhúsið með harmkvælum þó og með því að kæla brunann á 2ja mínútna fresti. Nú er ég að fara yfir lokaskýrslur nemenda og þarf að sitja við það í allt kvöld eins og í gærkvöldi. Mesti sársaukinn er farinn þannig að þetta ætti að hafast, bara ein blaðra sem þvælist aðeins fyrir.

Aðfangadagskvöld

2008-12-25T23:28:00.001Z

Þessi mynd var tekin áður en ég lagði til atlögu við jólamatinn. Það endaði með því að ég var komin í rúmið fyrir klukkan ellefu með mígrenikast af ofáti!!!

Þorláksmessa

2008-12-24T01:25:00.005Z

Einar Axels bjargaði jólunum þetta árið með nokkrum rjúpum handa okkur og Valur sá í fyrsta sinn um hamflettinguna og fórst bara nokkuð vel úr hendi.

Síðasti sófagesturinn fór í nótt og nú fær Daníel bláa herbergið yfir jólin. Hér gengur jólaundirbúningur stresslaust fyrir sig enda lítið lagt upp úr stórþrifum. Í gær var laufabrauðið bakað en ég hef held ég aldrei verið svona sein með laufabrauðsbaksturinn sem var sá fyrsti sem Ellen tekur þátt í. Ég náði mér í veturgamalt sauðalæri í Fjarðarkaupum í dag sem nú moðsýður á eldavélinni. Jólagrauturinn er soðinn og tilbúinn fyrir morgundaginn. Hér hefur það orðið að hefð að borða möndlugrautinn í "hádeginu" á aðfangadag. Að venju skundaði ég niður og upp Laugaveginn í kvöld til að fá Þorláksmessustemmninguna. Mér finnst það alveg ómissandi partur af jólaundirbúningnum. Hjálpræðisherinn var á sínum stað að syngja jólalög og alveg mesta furða hvað margir lögðu leið sína í bæinn þrátt fyrir slagviðrið. Hér er ekki skata á borðum og ég hef engin áform um að taka upp þann sið. Lyktin truflar mig svo sem ekkert en má ég þá frekar biðja um sjósigna ýsu með hamsatólg!

Lokaspretturinn

2008-12-16T21:45:00.002Z

Þessi vika silast alveg áfram enda langþráð jólafrí að byrja á föstudaginn. Það er svo sem nóg að gera hjá mér þessa dagana og tíminn ætti því að vera fljótur að líða þó mér finnist það ekki. Ég er í prófyfirsetu fyrir hádegi sem getur stundum dregist fram yfir hádegi. Seinnipartinn er svo íslenskukennsla og þar að auki er ég að fara yfir próf í námskeiðinu sem ég er aðstoðarkennari í í HÍ. Jólastúss hefur því farið hægt af stað hér á bæ og ekki eitt einasta jólaskraut sjáanlegt enn sem komið er. Ég get svo sem gefið Scarlet það hlutverk að vera jólakötturinn til að bjarga málunum. Veit bara ekki hvort hún er nógu ógnvænleg í það hlutverk. Annars er ég ekkert að stressa mig yfir þessu og ætla að baka nokkrar laufabrauðskökur á sunnudaginn. Þá verður Valur kominn heim úr "helvíti" og getur hent upp seríum og skorið laufabrauð.
Myndin hér fyrir neðan er reyndar af mér og það má reikna með að fleiri gamlar myndir birtist fljótlega. Daníel lánaði mér nefnilega skannann sinn og ég bíð spennt eftir að hafa tíma til að skanna inn gamlar og góðar myndir :D

Kereretta?

2008-12-11T14:33:00.001Z

Jólaókindur á kreiki

2008-12-10T17:07:00.003Z

Ég hef verið að segja nemendum mínum frá ýmsum jólaókindum eins og Jólakettinum, Grýlu, Leppalúða og svo gömlu jólasveinunum. Þau horfa á mig með hryllingi enda ekki furða þegar maður fer að spá í það. Ég get ekki ímyndað mér að börnin hafi hlakkað mikið til jólanna hér áður fyrr því þá fóru þessar ókindur á kreik. Ef þú lentir ekki í krumlunum á Grýlu þá var viðbúið að Jólakötturinn næði að læsa klónum í þig. Það skipti ekki máli hvort þeirra náði þér því örlögin voru þau sömu, þú varst étinn!!!

Siglt úr höfn

2008-12-07T23:28:00.002Z

Haldiði að ég hafi ekki fundið vefmyndavél frá höfninni á Rifi
ég get bara fylgst með þegar báturinn sem Valur er á siglir úr höfn. Ég sagði honum að veifa mér þegar hann færi um borð en hann hélt nú ekki hahahaha.

Gestagangur

2008-12-06T20:07:00.003Z

Að vanda hefur verið gestkvæmt hjá mér þessa vikuna. Að vísu óvæntir gestir því Lurdes og Diogo komu óvænt suður í læknastúss og vantaði svefnpláss. Þar sem bláa herbergið var upptekið af rússneska sófagestinum mínum leysti ég málið með því að sofa sjálf á stofusófanum og lánaði þeim rúmið mitt. Þetta var nú bara ein nótt svo það var lítið mál.
Ilya yfirgaf svo landið í dag og nú á ég ekki von á neinum gestum fyrr en eftir viku, þá kemur ungur maður frá Singapore sem er í námi í Bandaríkjunum og verður í þrjá daga síðan ætla ég að taka hlé fram yfir áramót. Ilya náði sérlega góðu sambandi við kisurnar mínar og við áttum skemmtilegar rabbstundir um allt milli himins og jarðar en þó helst ýmsu tengt fornsögunum. Ég var að útskrifa einn hóp í íslenskunáminu og þar vorum við að bera saman jólahefðir heimalandanna sem er mjög áhugavert og skemmtilegt. Að sjálfsögðu yfirheyrði ég Ilya þegar ég kom heim um rússneskar jólahefðir eins og þær voru á tímum kommúnismans og eins og þær eru í dag. Hann er ótrúlega góður að tala íslenskuna en það er greinilegt að hann hefur lesið mikið af fornsögum því hann er oft svolítið forn í tali :) Hann sagði mér frá svolitlu athyglisverðu um íslenskan framburð á ll eða l eins og í bíll og bíl. Þetta hljóð sem verður til þegar við berum það fram finnst bara í löndum eins og Kazakstan og Azerbajdan! Ekkert annað indóevrópskt mál hefur þetta hljóð. Það var svo gaman að tala við hann því hann er svo fróður um allt mögulegt tengt íslenska tungumálinu og víkingatímanum.
Valur er á leiðinni á sjóinn á morgun. Hann fékk afleysingapláss á línubát vestur á Rifi og verður þar næstu 12 dagana en þá fer sá bátur í slipp. Ég er einmitt að verða búin með allan fiskinn minn svo hann getur fyllt aftur á kistuna :)
Í gærkvöldi fór ég á jólahlaðborð á Fjörukránni í Hafnarfirði með honum Binna mínum. Við fórum síðast fyrir tveimur árum síðan og fáum alltaf svo frábæra þjónustu hjá sjálfum eigandanum :) Frábær matur og skemmtilegt andrúmsloft með söng og gítarspili í léttum dúr. Það var alveg troðfullt þarna og engin kreppubragur sjáanlegur á fólki.

Myrkur og kuldi

2008-11-30T21:29:00.003Z

Ég gæti sofið endalaust þessa dagana eins og venjulega í desember. Leyfði mér að sofa lengi í dag en ætli það verði ekki síðasti svefndagurinn fram að jólum. Ég er búin að vera með tvær ástralskar stelpur í heimsókn síðustu 3 daga en þær fara í nótt. Á morgun kemur mjög áhugaverður gestur, rússneskur prófessor í forngermönsku sem er búsettur í Kanada og talar íslensku. Hann er að grúska eitthvað í textanum á fornritunum á Árnasafni. Ég hitti hann aðeins á Café Paris á laugardaginn ásamt núverandi gestgjafa hans sem reyndist vera tengdasonur Þorgríms Gestss. Þorri kom að okkur lepjandi kaffi þegar kl. vantaði 5 mín. í þrjú og við vorum auðvitað rekin af stað til þess að missa ekki af mótmælunum og Iliya að sjálfsögðu með okkur. Mikið helv. var kalt!!!! Meira að segja Rússinn var að frjósa í hel.
Hér á bæ hefur að sjálfsögðu verið dregið úr útgjöldum í matarinnkaupum og hafa kisurnar ekki heldur sloppið við sparnaðaraðgerðir. Mér varð það á að kaupa ódýran euroshop kattamat en þær svelta sig frekar í hel en borða hann. Scarlet er stöðugt að opna skápinn þar sem ég geymdi einu sinni kattamatinn til að gefa mér til kynna að hún vilji ekki sjá það sem er í dallinum og það er horft á mig ásökunaraugum þegar ég loka aftur og þykist ekki skilja hvað hún er að gefa í skyn. Það lítur út fyrir að ég verði að gefa mig og kaupa frekar dýrari matinn handa þeim.
Á þriðjudag byrjar svo yfirsetan í prófunum!

Farvel

2008-11-24T11:45:00.003Z

Þá er Mogens floginn á braut og ég þarf að byrja nýja morgunrútínu og hella sjálf upp á kaffið. Þegar ég fer næst til Köben verður bókastöflunum rutt úr sófanum hans til þess að koma mér fyrir þar :D Henrik og Kirsten hringdu í mig í gærkvöldi til að kveðja og bjóða mér í heimsókn þegar ég kem til Danmerkur, þessar elskur. Enn og aftur er ég búin að kynnast hreint frábæru fólki í gegnum sófagestasíðuna.
Ég sé fram á nokkuð rólega viku og ætti því að ná að slappa aðeins af áður en prófyfirsetan byrjar í næstu viku. Þá verður það stress fram að jólum.

Kátt í koti

2008-11-23T16:45:00.003Z

Þessi vika er búin að vera ótrúleg. Ég hef varla haft tíma til að anda eða spjalla við sófagestina mína. Ég gleypi í mig morgunmatinn með Mogens og er svo rokin og sé hann ekki fyrr en seint á kvöldin. Hann er svo að fara á morgun.
Ég átti samt góðan laugardag með honum um daginn þegar við fórum á opnunina á sýningunni. Fyrst mættum við samviskusamlega á mótmælin og ég sendi hann til að taka myndir af stemmningunni. Á eftir fórum við á sýninguna og hittum Henrik og frú sem eru eitt það yndislegasta fólk sem ég hef kynnst. Eftir sýninguna var það kaffi hjá þeim á meðan við biðum eftir að matarboðið byrjaði. Spænska tengdafólkið sem er víst tengdafólk dóttur Henriks var með í för svo við þurftum tvo bíla til að komast í matarboðið sem var haldið af sonum Sveins heitins. Það var alveg meiriháttar gaman enda Henrik hrókur alls fagnaðar að vanda og um kvöldið tróðu þeir bræður upp með honum með gítarspil og söng. Hann kenndi þeim nefnilega að syngja lög á ítölsku, dönsku og spænsku þegar þeir voru litlir og þetta var alveg stórkostlegt. Henrik er einn af þeim fáu sem hefur varðveitt barnið í sér þó hann sé kominn vel yfir sjötugt og gerir sér alltaf far um að eyða tíma með krökkunum. Hann vílar ekki fyrir sér að rúlla sér niður brekku ef sá gállinn er á honum og krakkarnir hreinlega dýrka þennan skrýtna kall sem er einn af þeim :D Mér finnst hreinlega forréttindi að fá að kynnast honum og Kirsten. Þau voru kærustupar þegar þau voru unglingar en giftust svo öðrum. Þegar þau voru bæði búin að missa maka sína náðu þau saman aftur og eru eins og ástfangnir unglingar :)
Best að elda kvöldmatinn. Mogens kom með fullan poka af lambakótilettum, sagðist ekki hafa þorað annað því það væri aldrei að vita hvað væru margir í mat hérna hahaha. Ég eldaði taílenskan kjúklingarétt í gær og var í því að bæta við diskum því alltaf bættist einhver við.

Mótmælastaða og kokkteilboð

2008-11-14T14:52:00.003Z

Henrik hringdi í gærkvöldi með breytt plan. Hann hafði verið að tala við konuna hans Einars Más og við eigum því fyrst að mæta í mótmælastöðu. Opnuninni seinkar því um klukkutíma. Mogens er búinn að vera að telja upp allt það mektarfólk sem mætir svo þetta verður ábyggilega mjög athyglisverður dagur hjá mér. Hann fór í dag með Henrik og frú og spænska tengdafólkinu í humarsúpu á Sægreifanum í hádeginu. Ég var búin að senda hann þangað og hann hreifst auðvitað af staðnum eins og allir sófagestirnir mínir gera :)

Full Monty

2008-11-12T18:10:00.003Z

Ég fékk þessa skondnu fyrirspurn í íslenskutímanum í dag frá einum kvenkyns nemanda mínum, konu á fimmtugsaldri. Gulla! Ísland maður striptease? Það tók mig smástund að skilja hver spurningin væri og vakti þetta mikla kátínu í tímanum. Hún var alveg hissa á því að það væru bara staðir þar sem konur strippa og er greinilega orðin langeyg eftir að sjá íslenskt lambhrútakjöt í allri sinni dýrð. Ég sagðist nú lítið vita um þetta en rámaði í að hafa séð viðtal við einhvern karlstrippara í Grindavík í einhverju blaði fyrir stuttu síðan. Henni leist nú ekki á að leita hann uppi þar og sagði svo að þetta væri allt í lagi því hún væri á leiðinni heim í frí og myndi bara kíkja á strippstað þar hahahahaha
Hér er kannski atvinnutækifæri fyrir íslenska full monty karla í kreppunni ;)

Svantes lykkelige sang

2008-11-12T15:11:00.004Z

Nýjasti sófagesturinn minn er 64 ára gamall danskur ljósmyndari og fornbókasali frá Kaupmannahöfn (eins og þið sjáið þá eru sófagestir á öllum aldri). Vinur hans listmálarinn Henrik Vagn Jenssen er að opna sýningu í Hafnarborg á laugardaginn í tengslum við sýningu á myndum Sveins Björnssonar og einhverjum samtíðarmönnum hans í Danmörku. Ég er sem sagt boðin á opnunina á laugardaginn ásamt útvöldu fyrirfólki auðvitað ;) Ef ég skil Mogens rétt þá erum við boðin í kvöldmat á eftir með Henrik og spænskri eiginkonu hans og fjölskyldu hennar. Fékk líka boð í mat til þeirra á föstudaginn en var nýbúin að ráðstafa deginum þegar það kom. Það er ósköp huggulegt að fá sér morgunkaffið með Mogens og spjalla um lífið og tilveruna "livet er ikke det værste man har, om lidt er kaffen klar". Hann þræðir auðvitað fornbókasölurnar hérna og vonast til að finna einhverja gullmola á spottprís til að selja í búðinni sinni í Köben.
Já maður er aldeilis að forframast í félagsskapnum :)

Með hor í nös og krepputal

2008-11-09T18:07:00.003Z

Ég er búin að liggja í rúminu alla helgina og snýta mér í heilu klósettrúllurnar en er eitthvað að skríða saman sem betur fer. Nú er ég komin yfir í hvítlauks og hunangskúrinn.

Nú heyri ég í fréttunum að það séu komnar neyðaráætlanir í skólum vegna kreppunnar til að fylgjast með hvort börnin komi með lélegra nesti eða hætti að borða heitan mat. Mér varð nú hugsað til nestispakkans hans Vals á sínum tíma sem þótti víst ekki merkilegur. Ávextir voru munaður enda Bónus og aðrar lágvöruverslanir ekki til og hvað þá mæðrastyrksnefnd og ef boðið hefði verið upp á heitan mat á þeim tíma hefði hann örugglega ekki getað nýtt sér það. Nógu erfitt var að skrapa saman fyrir mjólkurmiðum fyrir mánuðinn. Einhvern tíman var svo hart í búi hér á heimilinu að ég bakaði kleinur til að hann fengi eitthvað nesti með sér og viðbrögð skólans voru skammir fyrir lélegt nesti. Nú þurfa margar fjölskyldur að upplifa raunveruleika einstæðra foreldra (sem oft heyrist að hafi það svo gott) og þá er það allt í einu orðinn skelfilegur raunveruleiki. Ég var einmitt að rifja það upp með Val hér áðan að oft var hvítur sykur eina áleggið sem til var á brauðið í lok mánaðarins. Ekki það að ég sé eitthvað mótfallin því að fylgst sé með hvort börn fái ekki nægan mat og reyndar finnst mér að öll grunnskólabörn eigi að fá ókeypis heitan mat í skólanum. Samt sem áður er ég á því að með því að hamra stöðugt á hvað kreppa sé skelfileg að þá sé verið að senda börnum skilaboð um að peningar skipti öllu máli. Í staðinn fyrir að horfa stöðugt á hvað ekki sé lengur hægt að leyfa sér þá finnst mér mikilvægara að horfa á hvað hægt er að leyfa sér án þess að það kosti krónu. Það þarf hreinlega hugarfarsbreytingu.

Nýja Valbjörg

2008-11-05T20:44:00.004Z

Skilaboð til fjölskyldunnar: Ef þið smellið á Valbjargar linkinn þá ætti nýja síðan að koma upp. Ég var að lagfæra stillingarnar. Látið mig vita ef þið komist ekki inn á hana.

Ég var líka að setja inn tengla hérna á Netfrænkunni á blogg litlu baunanna þar á meðal glænýja baunans í Árósum :D Það koma örugglega fljótlega inn myndir þar.

Spenna í lofti!!!!

2008-11-04T22:08:00.003Z

Það er aldeilis spenna í gangi núna. Ég tími varla að fara að sofa. Dilja búin að missa vatnið og komin á fæðingardeildina og Obama vonandi að vinna forsetakosningarnar!!

Reyndar er ég með einhverja kvefpest og neyðist því til að koma mér í háttinn. Nemendur mínir hafa verið afskaplega duglegir að gefa mér hinar ýmsu uppskriftir sem duga gegn kvefi. Núna er ég með tilraunastarfsemi í gangi að setja fjallagrös út í hunang og láta standa í einn dag á hlýjum stað. Veiða svo grösin upp og búa til te.

Annars er þessi aðferð með hvítlauk (eða lauk segja sumir) í stað fjallagrasanna mjög öflugt kvefmeðal. Svo var einhver uppskrift frá Lettlandi með rauðrófusafa og einhverju sem ég man ekki hvað er.

Ég fór í dag og óskaði eftir yfirsetu í prófum í HÍ og var tekið opnum örmum enda lækkar meðalaldur þeirra sem sitja yfir verulega með mig innanborðs og er ég þó ekkert unglamb. Man eftir einni í fyrra sem kom á 10 mínútna fresti og spurði hvort hún ætti ekki að leysa mig af. Ég svaraði alltaf á sömu lund að ég myndi hóa í hana ef mig vantaði afleysingu. Held líka að margar þeirra gömlu séu hálf nervusar við tölvuprófin en það er alltaf að aukast að tölvurnar séu notaðar við próftöku.

En mikið verður gaman þegar litli Sindra- og Diljusonur verður kominn í heiminn :D

Fiskiveisla

2008-11-02T17:17:00.003Z

Ég var að átta mig á hvað tíminn flýgur, það er kominn nóvember og nú þarf að finna heppilega dagsetningu fyrir laufabrauðsbakstur. Jiii það eru bara að koma jól!!! Þar sem ég er í harkinu í vinnumálum þá ætla ég að reyna að fá sama djobbið og í fyrra, að sitja yfir í prófum í Háskólanum. Alveg ágætis uppgrip og fínt að fá einhvern aur í janúar.

Vinafólk mitt frá Danmörku er búið að vera hjá mér síðustu viku en þau eru að fara í nótt og ég á eftir að sakna þeirra. Í gærkvöldi var veislumáltíð hjá okkur því ég á svo mikinn skötusel og humar sem þarf að koma í lóg. Að sjálfsögðu var Brian settur í kokkaríið enda algjör meistarakokkur og nammi namm hvað þetta var gott hjá honum. Ég er að hamast við að borða fiskinn úr kistunni og er langt komin með þorskinn og humarinn. Valur ætlar nefnilega að skella sér á sjóinn aftur eftir áramótin enda lítið að gera smíðavinnunni þó enn hafi hann vinnu við það.

Pönnukökudagur í Einholtinu

2008-10-26T12:06:00.002Z

Þá er ég orðin mannfræðingur :D

Þraukaði gegnum athöfnina í Háskólabíói og fór svo beint heim og lá í spennufalli það sem eftir var dags. Í dag eru það svo pönnsur í tilefni áfangans. Vaknaði tímanlega í morgun til að gefa sófagestinum mínum íslenskar pönnukökur áður en hún færi. Þetta var heilmikil upplifun fyrir hana að sjá hvernig rjómi er þeyttur og pönnukökudeig er búið til. Hún er nefnilega frá Bandaríkjunum og þar kaupa menn bara tilbúið deig og þeyttan rjóma. Þessi sófagestur er fisksali að atvinnu og ekki beint hægt að sjá það á henni. Maður ímyndar sér alltaf fisksala sem gamla karla en hér er ung kona með hring í miðnesinu, tattú og lokka út um allt bak. Stuttklippt með dreadlokka öðrum megin en nauðrökuð á hinum helmingnum af höfðinu. Afskaplega kurteis og viðkunnanleg ung kona en ég verð að viðurkenna að það var ekki gott að sjá hvort hún væri maður eða kona því hún klæðist eins og karlmaður og ekki er sílikoninu fyrir að fara í þessum barmi. Svo heitir hún Jack sem ég hélt að væri karlmannsnafn en það er víst engin mannanafnanefnd í Bandaríkjunum sem ákveður hvað er karlmanns- og hvað er kvenmannsnafn enda er algengt að sömu nöfn eru notuð á karla og konur.

Núna er Kristín systir að koma í pönnsur :)

Öppdeit

2008-10-22T20:11:00.003Z

Það er bara búið að vera svo mikið að gera hjá mér að ég hef ekki komist í að blogga. Reyndar var tölvan líka að hrella mig svo ég gat ekkert notað hana um síðustu helgi en nú er ég búin að taka rækilega til á henni og krossa putta að það dugi. Hér er búið að vera gestkvæmt upp á síðkastið, vinir, fjölskylda og sófagestir. Alveg ægilega gaman hjá mér og dásamlegt að geta farið á kaffihús án þess að vera í stresskasti eða með sektarkennd yfir því að slæpast. Ég fór á off venue tónleika með sófagestum í síðustu viku og á sunnudaginn hóaði Adriënne vinkona mín í mig þar sem hún sat á uppáhaldskaffihúsinu okkar Babalú en þar voru aftur off venue tónleikar svona í lok Airwaves. Ég fór einmitt á Babalú með sófagestunum mínum en þar er alveg frábær þjónustustúlka að vinna. Hún er alltaf svo utan við sig og spaugileg. Þegar hún var að leggja hnífapörin á borðið hjá okkur þá fékk hún sér sæti við hliðina á okkur á meðan hahaha, aðeins að hvíla lúin bein.

Fyrripart sunnudags fór ég með Hrefnu, Finni, Bríeti og Rán í verslunarleiðangur í Smáralindina og fleiri búðir í Kópavoginum. Deginum áður hafði ég hitt Betu á kaffihúsi í Kringlunni og náttúrulega gleymdi mér alveg því það er svo langt síðan við höfum hist. Var næstum of sein að sækja Adriënne á BSÍ. Hún var hjá mér þangað til í dag og kemur svo aftur í næstu viku í nokkra daga og þá verður Brian maðurinn hennar með.

Í gær var ég að klára að búa til veggspjald sem verður á Þjóðarspeglinum í Háskólanum á föstudaginn. Það er stutt kynning á rannsókninni minni. Svo er búið að vera heilmikið stúss í kringum kennsluna hjá mér.

Á laugardaginn er svo útskriftardagurinn minn!!

Skítverkin

2008-10-10T22:11:00.002Z

Loksins er komin helgi!!! Fyrsta helgin í laaaaaaangan tíma sem ég á fríííí!!

Er byrjuð að stinga út úr "fjárhúsinu" enda kominn tími til. Kettirnir voru meira að segja farnir að þrífa þeim blöskraði svo útgangurinn á heimilinu. Komu með rykbólstrana í hrönnum til mín og ég skildi svo sem að hverju þær væru að ýja enda var ryksugunni fagnað með látum þegar hún fór loksins í gang. Það er búið að vera mikið að gera hjá mér alla vikuna að vinna upp ýmis verk sem hafa setið á hakanum í kennslunni. Ég læri alltaf eitthvað nýtt í íslenskukennslunni og í gær komst ég að því að íslenskir hundar þykja ekki góðir til átu hahahahaha. Í öðrum hópi vorum við að tala um stíflað klósett og skemmti ég nemendunum með sögunni af mér þegar ég ætlaði að losa stíflu úr klósettinu með ryksuguna á öfugum blæstri hér um árið. Veggir, loft, gólf og ég sjálf var útsvínað á eftir en klósettið var enn jafnstíflað hahahahaha.

Vordís kom frá Danmörku í dag og ætlar að vera hjá mér í 6 daga :D Svo kemur mamma í bæinn á morgun og Beta líka. Frábært að hafa loksins tíma til að sinna gestum.

Á morgun ætla ég að sofa út. Er lítið sofin eftir vikuna. Alltaf dauðþreytt á kvöldin en um leið og ég leggst á koddann þá PLING er glaðvöknuð. Greinilega ennþá spenna í mér en ætli það fari nú ekki að rjátlast af mér.

Níu merkur

2008-10-06T22:54:00.002Z

Sjö marka barnið sem mig dreymdi í sumar reyndist vera níu merkur :)

Já nía varð það heillin ;-) Ég er enn í spennufalli og skýjunum og allt þar á milli hahaha. Ég kippi mér ekki einu sinni upp við að þjóðarskútan sé að sökkva. Pólverjarnir í tímanum hjá mér í dag sögðu að nú væri komið að okkur Íslendingum að flykkjast til Póllands í leit að betra lífi hehehe. Nú kemur sér vel að hafa hangið á horriminni síðustu árin, held því bara áfram.

Næst á dagskrá hjá mér er að ná meðgönguspikinu af mér. Sund og ganga er ódýr og góð líkamsrækt.

Harkaleg fæðing

2008-10-03T21:17:00.002Z

Jæja þá er þetta afstaðið og það með látum. Skilaði af mér í gær eftir nærri tveggja sólarhringa vöku og er gjörsamlega búin á því. Svaf til klukkan fjögur í dag takk fyrir. Það var stuð á mér í kennslunni í gær, var að kenna til 20 um kvöldið og orðin gufurugluð eftir alla þessa vöku ha ha ha, held ég hafi verið farin að syngja fyrir þau tíhíhí. Nú er bara að aðlagast nýju lífi og njóta þess að vera laus við alla þessa pressu. Ég hlakka til að fara að hitta fólk aftur :D

Matarboð

2008-10-01T11:20:00.003Z

Ég átti þennan fína afmælisdag í gær. Var að kenna stanslaust frá 13 til 20 eða þrjú námskeið út um allan bæ. Strax að því loknu var brunað í afmælismat til Ricardo og Tamöru ásamt Gunnari og Val. Ekta mexíkóskur matur og tónlist :D fyrir utan að chilið var sparað til að drepa okkur ekki. Valur þurfti samt að prófa að borða smábita af grænum pipar og var nánast í andarslitrunum á eftir öllum til mikillar skemmtunar. Þau kenndu okkur að borða salt til að draga úr áhrifunum. Þetta var frábært kvöld enda góðir gestgjafar og mikið hlegið og skemmt sér. Tamara skipti um vinnu frá því að vaska upp á kaffi Oliver og færði sig yfir á Santa Maria sem er mexíkóskur veitingastaður á Laugaveginum. Mæli með honum mjög ódýrt og ekta mexíkóskur matur. Ritgerðin er að smella saman bara eftir fínpússning :)

Er á lífi!

2008-09-25T21:21:00.003Z

Ég þori ekki annað en að gefa frá mér smá lífsmark, fólk er farið að hafa áhyggjur :-) Ég er enn að ströggla við ritgerðina en NÚNA er loksins farið að sjá fyrir endan á þessu. Ætti að ná að klára um helgina. Ég er líka byrjuð á fullu í kennslunni og er komin með þrjá hópa alla eftir hádegi frá mánudegi til fimmtudags. Á föstudagsmorgnum er ég með hópinn í háskólanum og ætla að láta þetta duga. Fínt að hafa morgnana til að undirbúa kennslu svo ég fái kvöldin frí.

Heimilishjálpin mín er búin að fá vinnu (bæði tvö) og íbúð og flytja sennilega inn á morgun. Þau eru komin til Íslands til að setjast að fyrir fullt og allt og ég ætla að sjá um að kenna þeim íslensku þegar ég verð búin. Ég er náttúrulega búin að tryggja mér "barnabörn" þegar þau koma og ætla að vera íslenska amman :-D

Valur sá um matseldina í kvöld og steikti snitsel sem beið mín þegar ég kom heim úr vinnunni. Hann langaði í brúnaðar kartöflur með og þessi fyrsta tilraun hans tókst bara ágætlega. Ég var ekki einu sinni nálægt til að hjálpa honum, sem betur fer því ég tek alltaf stjórnina. Hann segist vera kominn með mission, að elda reglulega. Í fyrradag var það bolognese sem er hans spesíalitet.

Ég lofa því að um leið og ég er búin að skila þá verður það tilkynnt hérna stórum stöfum :-)

Já og Ólöf og Benni, TIL HAMINGJU MEÐ BARNABARNIÐ!!!!!!!

Au pair

2008-09-17T17:00:00.002Z

Ég er komin með mexíkóska heimilishjálp, tvöfalda meira að segja. Þetta eru ung hjón sem eru að flytja til landsins og verða hjá mér fyrst um sinn. Hér verður sem sagt mexíkóskur matur á borðum á næstunni og séð um uppvask og þrif fyrir mig jibbbíííí!!!!!!!

Skrifin ganga bara nokkuð vel og 98% öruggt að ég skili á mánudaginn. Í gær leit út fyrir að ég væri að fá pest var með hálsbólgu og dúndrandi höfuðverk. Sauð mér fjallagrasaseyði og dældi í mig C vítamíni og sólhatt og eftir góðan nætursvefn er ég allt önnur. Guði sé lof að þetta er að verða búið!

Myrkraverk

2008-09-14T15:05:00.003Z

Það er ekki ljós á einum einasta ljósastaur í götunni hjá mér og má sennilega kenna um framkvæmdunum milli Einholts og Þverholts. Þar sem ekkert hefur verið að gerast í þeim síðustu mánuði þá lítur út fyrir að við verðum ljóslaus lengi enn sem mér líst ekkert á. Í gærkvöldi var ég á leið út í sjoppu í myrkrinu og sá móta fyrir stórum og að því er mér virtist, frekar hoknum manni framundan mér. Ég gekk auðvitað rösklega enda ekkert vel við að paufast þarna í myrkrinu. Sem ég kem upp að hlið mannsins heyrist hátt stutt urr frá honum og trúið mér hjartað tók tíu aukaslög og hárin risu á höfðinu. Tunglið var fullt og vel er þekkt að þá fara varúlfar á kreik. Fyrstu viðbrögð voru því að snúa við og flýja öskrandi heim en sem betur fer harkaði ég þó af mér enda kom í ljós að þetta var bara nágranni minn sem er langt frá því að líkjast varúlfi og urrið kom frá smá kjölturakka kvikindi sem hann var með í kvöldgöngu :)

Á fleygiferð

2008-09-09T10:13:00.001Z

Ég náði góðri hvíld um helgina og svaf fram að hádegi í gær. Allt annað líf og nú flæðir textinn frá mér jibbbíííí :)

Í kapp við tímann

2008-09-06T20:56:00.003Z

Jæja ég fékk frest í rúmar tvær vikur og er ekkert lítið fegin. Þá er bara að ná að klára áður en líkaminn gefur sig aftur. Ég er farin að ganga verulega á mig og hef lítið úthald þannig að allt stefnir í sömu átt og fyrir ári síðan með tilheyrandi handskjálfta og svima. Ég er ákveðin í að klára þetta svo ég geti farið að vinna í að ná heilsunni aftur. Verð bara að vera dugleg að taka djúpslökun inn á milli, það virkar alveg ótrúlega vel.

Fékk bréf frá Davíð frænda í gær, verðum víst að fara að hysja upp um okkur og koma út tilkynningu um Rauðholtsættarmótið. Hann óskaði eftir sjálfboðaliða í að halda utan um skráningargjöld og að sjálfsögðu bauð ég mig fram í það. Mér líst miklu betur á það en að vera í matar- eða skemmtinefnd, annars skilst mér að austanfólk ætli að sjá um matinn. Það toppar nú samt örugglega ekki matinn á Þorkelsmótinu!!

Valur var að byrja í kvöldskólanum í FB og tók bara einn áfanga á fyrstu önninni svona til að aðlagast skólaumhverfinu á ný. Það er ekkert auðvelt að byrja aftur eftir allt niðurbrotið í grunnskólanum. Ég verð enn bara reið þegar ég hugsa um þá martröð og legg ekki í að byrja að skrifa það sem mér finnst um íslenska skólakerfið því það yrði svo langur reiðipistill. Núna ætla ég að skríða snemma í háttinn og sofa út í fyrramálið svo ég verði í góðum vinnugír.

Góða helgi!

Fallegu systurnar

2008-08-30T19:38:00.001Z

Mikið óskaplega á ég fallegar systurdætur :D

Gunnar Björn tók þessa mynd af þeim systrum í sumar og ég gat ekki stillt mig um að setja hana hér inn.

Vinnuhornið mitt

2008-08-28T15:54:00.002Z

Takið eftir fallega manninum á myndinni fyrir ofan vinnuborðið mitt! Getið þið giskað á hver þetta er ;-) Ef smellt er á myndina þá stækkar hún.

Kóngulær

2008-08-27T17:51:00.004Z

Ég er enn á lífi og geðheilsan þokkaleg. Þetta mjakast allt áfram og tekur senn enda. Valur er að vinna í Borgarnesi þessa vikuna svo ég er að mestu leyti ein heima, Ellen og Daníel koma af og til. Nú er ég farin að vinna fram eftir nóttu og sef fram að hádegi. Það er svo rólegt á nóttunni að þessi rytmi á ágætlega við mig. Draumarnir eru enn frekar spennukenndir með risakóngulóm sem hrynja úr loftinu. Mér þykir samt frekar vænt um kóngulær svo ótrúlegt sem það er og þær boða yfirleitt gott. Það er ein lítil í glugganum hjá mér sennilega að leita sér að bústað fyrir veturinn. Hún er meira en velkomin að hafa vetursetu hér enda fer lítið fyrir þessum greyjum. Jú víst er geðheilsan góð!!!!

Eftirmæli

Stuttu eftir að ég skrifaði þetta varð mér á að loka stofuglugganum. Sú litla, blessuð sé minning hennar, hafði ekki valið sér gáfulegan stað til að hreiðra um sig. Gluggafalsinn!! Hún kramdist því til bana þegar ég lokaði glugganum. Ég er með móral!

Hríðaverkir

2008-08-20T20:04:00.002Z

Þetta ætlar að verða erfið fæðing hjá mér. Ég er með mikla hríðaverki sem eiga pottþétt eftir að aukast því útvíkkun gengur hægt. Ég er sett 5. september en vonast til að fá að ganga einhverja daga framyfir ef ég ber mig nógu aumlega.

Í gær var hringt í mig og ég beðin um að taka aftur umræðuhóp í HÍ fyrir jól. Þetta verður bara einn hópur núna svo ég ákvað að slá til ef ég fengi tímann á föstudögum kl. 10 sem var samþykkt. Það er nefnilega engin íslenskukennsla á þeim dögum en hún fer líka að byrja. Ég reikna með að taka eitt kvöldnámskeið tvisvar í viku plús svona tvö dagnámskeið.

ÆÆÆÆÆÆ þar kom hríð!!!!

Krækiber og hænur

2008-08-12T22:50:00.003Z

Mig er búið að dreyma óskaplega mikið upp á síðkastið enda næ ég engum djúpsvefni. Er komin í vel þekkt spennuástand sem fylgir prófum og verkefnaskilum, stöðugt adrenalínflæði. Sem sagt draumarnir. Tvisvar hefur mig dreymt að ég væri svona líka svakalega hárprúð. Með þykkt og mikið sítt hár, meira að segja dreadlokka í annað skiptið. Svo dreymdi mig að ég væri að flytja heim í Hafursá og var að leggja drög að því að fá mér íslenskar hænur. Verst þær voru svo ansi dýrar 65.000 kall stykkið. Það besta var þegar ég fór í krækiberjamó og fann krækiber á stærð við grasker sem þurfti báðar hendur til að halda á. Ég var að segja Kolbrúnu frá þessu áðan og hún sagði: "Nú þú hefur þá fundið eitt af krækiberjunum hans Finns". Ég hváði við og þá útskýrði hún fyrir mér að þegar Finnur var ungur maður þá voru krækiberin fyrir austan svo stór að hann þurfti að rúlla þeim niður brekkuna!!

Dansað niður Laugaveginn

2008-08-10T21:33:00.001Z

Í gær tók ég pásu frá ritstörfum til þess að taka þátt í Gay pride ásamt fleira fólki (bæði íslensku og erlendum gestum) úr Couch surfing hópnum. Við ákváðum að fagna fjölbreytileika mannlífsins með því að vera hluti af Gleðigöngunni og dönsuðum því saman niður Laugaveginn. Þó svo Gleðigangan hafi í upphafi eingöngu verið ganga samkynhneigðra þá hefur hún breyst yfir í það að snúast um mannréttindi. Að allir hafi rétt á því að vera þeir sjálfir, svo framarlega sem það skaði ekki aðra. Þar sem ég er ekki beint týpísk miðaldra kona þá fannst mér vel við hæfi að taka þátt :D Ég viðurkenni að ég var hálf stressuð í byrjun við tilhugsunina að dansa fyrir framan tugþúsundir manna en um leið og við lögðum af stað leið það hjá og ég fann til ótrúlegs frelsis að geta verið bara eins og ég er. Þetta var alveg meiri háttar gaman en aldurinn eða eigum við að segja kyrrsetan er farin að segja til sín því ég var aum í öllum skrokknum á eftir og er búin að vera hálflasin í dag. Ekkert samt sem íbúfen lagar ekki svo ég er búin að sitja samviskusamlega við skriftir í dag. Valur var nú ekkert yfir sig hrifinn af uppátæki móður sinnar ha ha ha en Daníel fannst verst að hafa misst af mér. Nú bíð ég bara eftir að heyra orðróm um að ég sé komin út úr skápnum muahahahahahaa!

Heim á ný

2008-08-06T23:18:00.002Z

Heldur voru menn nú framlágir þegar gengið var á land úr Herjólfi í Þorlákshöfn klukkan hálfþrjú í nótt ha ha ha! Samt á að skella sér aftur næsta ár auðvitað og læra af þessari fyrstu reynslu. Einn sími enn týndist.

Innipúkar

2008-08-04T00:39:00.003Z

Í kvöld bakaði ég pizzur fyrir okkur innipúkana mig, Gunnar Björn og Daníel og var þeim gerð góð skil að venju. Dagga vinkona er stödd á landinu og leit við hjá mér seinnipartinn mér til mikillar gleði. Hún sýndi mér myndir af fallegu ömmustrákunum sínum. Ég fékk svo Brekkusöng í beinni frá Þjóðhátíð í símanum áðan. Greinilega mikið stuð þar og sumir orðnir hálfraddlausir (Valur). Ritgerðarvinna hefur gengið ágætlega í dag og kvöld, er núna að skrifa um íslenska þjóðernishyggju. Ætla að drífa mig í háttinn núna, er búin að lofa Daníel að vekja hann klukkan hálfátta í fyrramálið og horfa á eftir honum út um dyrnar. Hmmm ég held að strætó byrji ekki að ganga fyrr en klukkan 10 eins og á sunnudögum, sennilega verð ég að skutla honum í vinnuna.

Home alone!

2008-08-01T23:29:00.003Z

Ég keyrði unga fólkið til Þorlákshafnar í gærkvöldi, ja eða nótt. Það var brottför með Herjólfi kl. tvö sem að vísu var svo seinkað um klukkutíma enda troðfullt skip. Þetta er fyrsta Þjóðhátíð þeirra beggja (Valur og Ellen) og tilhlökkunin eftir því. Ég sá nú ekki betur en hátíðin væri byrjuð þarna á bryggjunni í Þorlákshöfn því þegar við mættum á hafnarbakkann var okkur vísað á gám á bak við bíl björgunarsveitarinnar. Að vísu var þetta ekki dauðagámur heldur farangursgámur en mér kæmi ekki á óvart að menn hafi breytt hlutverki hans eftir komuna til Eyja því margir voru orðnir vel við skál og enn hátt í fjórir tímar þar til lagst yrði að bryggju í Eyjum.

Nú ætla ég að nota tímann og kyrrðina vel um helgina enda veitir ekki af. Um síðustu helgi var ég í örvæntingar og kvíðakasti en tókst að komast út úr því og er bara ágætlega bjartsýn núna og búin að vinna vel í dag. Ég ætla að gefa skít í allt heilsufæði og borða bara sælgæti, ís og aðra óhollustu eins og mér sýnist já og drekka marga lítra af kaffi og reykja eins og strompur. Það eina sem kemst að hjá mér þessa dagana er að klára þessa blessuðu ritgerð hvað sem tautar og raular.

Geitunga- og sólarfár

2008-07-29T19:50:00.004Z

Miðað við fréttir um geitungaþurrð hjá meindýraeyðum á höfuðborgarsvæðinu þá þykir mér einkennilegt hversu mikið af þessum kvikindum læðist inn um gluggana hjá mér. Það líður ekki sá dagur að ég rekist ekki á geitung hér inni. Ég verð nú að segja það að mér þykir ég bara orðin ansi borubrött í návist þeirra, annað en fyrstu árin sem þeir slæddust hér inn. Þá flúði ég nánast húsið ef ég varð vör við þá eða greip hársprey brúsa og murkaði úr þeim líftóruna. Nú læt ég sem ég sjái þá ekki og það bregst ekki að eftir smátíma hunskast þeir út aftur. Hvernig stendur eiginlega á því að það setjast ekki hér að litfögur fiðrildi fólki til ánægju og yndisauka í staðinn fyrir þessa hvimleiðu geitunga sem alltaf þurfa að vera í andlitinu á manni.

Bölvað ólán er þetta annars að geta ekki notið veðurblíðunnar þessa dagana. Tók samt hlé í dag frá lærdómi og rölti niður á Ingólfstorg að kaupa mér ís. Þar var löng biðröð að sjálfsögðu en ég lét mig samt hafa það því mig langaði svo mikið í ísinn. Var nánast kominn með hitaslag þegar ég kom heim aftur þannig að þetta varð ekki beint hressingarganga. Mér skilst að morgundagurinn eigi jafnvel að vera "verri" ætli ég þori nokkuð út fyrir dyr. Ég held ég hafi fengið of stóran skammt af sól og hita á Ítalíu.

Humarveisla

2008-07-27T20:28:00.003Z

Hér var humarveisla í kvöld í boði Vals. Hann kom nefnilega heim af sjónum í vor með rúm 5 kíló af humri og er ekki seinna vænna að hann læri að matreiða humar. Við borðuðum öll yfir okkur að sjálfsögðu og samt var afgangur. Ég tek það fram að við elduðum ekki öll 5 kílóin! Ég stakk upp á því við Val að hann tæki afganginn með í nesti í vinnuna á morgun ha ha ha. Mér tókst að grafa upp eina flösku af krækiberjasaft af kistubotninum þannig að í eftirrétt var rjómagrautur með krækiberjasaft (svona þegar aðeins var farið að sjatna í mannskapnum). Annars sá ég á mbl.is að krækiberjasprettan á Austurlandi verður víst með betra móti. Vonandi kemst ég austur í berjamó í einhverja daga þegar ég verð búin að skila af mér verkefninu.

Ættarmót

2008-07-21T21:24:00.004Z

Begga í blindandi ruslatínslu leidd áfram af Pétri

Mikið lifandis skelfing var gaman á þessu ættarmóti og frábært hvað það var vel mætt. Veðrið lék við okkur og mér fannst alveg ferlegt að þurfa að yfirgefa Austurlandið í blíðskaparveðrinu sem var þar í gær. Ég fór þó heim með einn titil í farteskinu sem er meistari í rúmfataásetningu (heitir það annars ekki það). Þarna kom sér vel að vera í þjálfun eftir alla sófagestina sem ég hef búið um síðustu mánuði. Það dugði þó ekki til því Kristínarleggurinn skíttapaði fyrir Soffíuleggnum sem er náttúrulega skammarlegt fyrir langfjölmennasta legginn. Nú er bara að nota næstu fimm ár í æfingar í þúfnahlaupi því ég gæti best trúað því að menn taki doktor Hjálmar á orðinu og bæti því inn í íþróttagreinakeppnina. Hver veit hvað gerist svo næsta sumar á Rauðholtsættarmótinu, ég er sko í undirbúningsnefnd fyrir það mót.

Eftir að hafa keyrt bæði suður og norðurleiðina þessa helgi þá er ég með það á hreinu að framvegis fer ég norðurleiðina svo framarlega sem hún verður fær. Það má vel vera að suðurleiðin sé beinni en það eru ábyggilega 50 einbreiðar brýr á leiðinni þannig að ég var alltaf að hægja niður. Svo er hundleiðinlegur og seinfarinn kaflinn frá Höfn og í Egilsstaði (ég hafði auðvitað ekki rænu á að fara fjarðarleiðina). Á bakaleiðinni keyrði ég norðurleiðina og var með krúsið á nánast allan tímann (á löglegum hraða auðvitað) þannig að bæði vorum við fljótari og bíllinn eyddi miklu minna.

Færeysk til fótanna

2008-07-16T15:09:00.004Z

Fyrirbærafræðileg nálgun og grunduð kenning!! Þetta eru hugtökin sem ég er að vinna með núna enda heyri ég urgið í heilanum þegar hann þjösnast í gegnum þetta. Hann fær þó pásu um helgina því ég er á leiðinni austur á ættarmót. Við Valur og Ellen ætlum að leggja í hann upp úr hádegi á morgun ef allt gengur upp. Þetta verður því miður stutt stopp núna. Við keyrum til baka á sunnudaginn. Á meðan ég er fyrir austan ætlar Oddur hinn færeyski og írska kærastan hans að gæta bús og katta. Oddur ætlar að baka færeyskar pönnukökur handa mér í kvöld. Ég er bara í því að bera saman pönnukökur hinna ýmsu þjóða, ekki amalegt það ha ha ha.

Mér áskotnuðust appelsínugulir flókaskór úr þæfðri ull (gráir að innan) ekkert smá flottir enda færeyskir að uppruna.

Kveðjubros

2008-07-13T22:40:00.003Z

Sigurbjörg systir og Freya stoppuðu hjá mér í tvo daga á leiðinni heim til Álaborgar. Það var ægilega erfitt að kveðja þær en ég tók mynd af litlu skvísunni á flugvellinum og hún sendi mér þetta fallega kveðjubros.

Au revoir!

2008-07-13T00:27:00.003Z

Ég fékk sófagesti frá Frakklandi, hjón rúmlega fimmtug. Við Ely erum búnar að vera í sambandi á msn síðastliðna 3 mánuði og því var þetta eins og að fá gamla vini í heimsókn. Þau gistu tvær nætur í byrjun ferðar og svo eina nótt í lokin og við erum búin að hafa það ægilega notalegt saman, ég er m.a. búin að læra að búa til franskar pönnukökur eða crépes (bæði sætar og saltar) og ávaxtasúfflei. Í gærkvöldi elduðum við sem sagt saman, ég steikti lúðu með bönunum og gráðostsósu og Ely bjó til súffleiið. Eftir að við höfðum borðað á okkur gat af aðalréttinum og biðum eftir að súffleiið bakaðist skrapp Ely á msn að athuga statusinn heima þar sem tvær uppkomnar dætur þeirra voru að passa 8 ára bróður sinn sem reyndist vera með yfir 39 stiga hita en kartöflurnar spretta vel. "Við sækjum ykkur svo á lestarstöðina á morgun" sagði dóttir hennar sem varð til þess að allt í einu áttuðu þau sig á því að þau áttu flug kl. eitt eftir miðnætti á föstudagskvöldinu en ekki laugardagskvöldinu. Þið getið rétt ímyndað ykkur panikkið sem greip alla en sem betur fer stóð það ekki lengi því klukkan var nú bara hálfníu og nægur tími til stefnu því auðvitað skutlaði ég þeim til Keflavíkur og við gátum gætt okkur á súffleiinu áður en við lögðum í hann. Ég gat vel sett mig í þeirra spor því það sama gerðist hjá okkur á Ítalíu að við misstum úr einn dag. Við uppgötvuðum það nú sem betur fer nokkrum dögum fyrir brottför en gátum engan vegin áttað okkur á hvenær við höfðum misst úr dag því við vorum allar þrjár með það á hreinu að það væri föstudagur þegar það var í raun laugardagur. Líklegasta skýringin er náttúrulega sú að okkur hafi verið rænt af geimverum ha ha ha. En allavega ég er byrjuð að plana heimsókn til Ely og Erics í Besancon næsta ár með viðkomu hjá Karine í París og kannski fæ ég fleiri Frakka í heimsókn sem ég get komið við hjá.

Myndir

2008-07-09T20:29:00.001Z

Ítalíumyndirnar eru komnar inn í netalbúmið mitt!

Kaffifíkinn búálfur með símadellu

2008-07-03T21:18:00.004Z

Ég fór í bankann í dag og tryggði mér framfærslu fram á haust þannig að ég geti algjörlega einbeitt mér að ritgerðinni. Þvílíkur munur að þurfa ekki að vera að hlaupa á milli vinnu og verkefnis. Er líka alveg endurnærð og full af orku eftir Ítalíuförina þannig að nú sit ég við skriftir öllum stundum.

Hér á heimilinu hafa undarlegir hlutir átt sér stað. Svo virðist sem einhver kaffiþyrstur hafi laumast hér inn og hnuplað kaffikrukkunni og líka neskaffinu nema hingað hafi flutt inn kaffifíkinn búálfur. Um síðustu helgi hvarf svo heimasíminn (tólið). Við erum búin að leita á öllum stöðum sem okkur getur dottið í hug án árangurs. Ég sá því ekki annað í stöðunni en að skunda í ELKO í dag og kaupa eitt stykki síma. Ódýrasti síminn hjá þeim er á tæpar 4.000 krónur (eins og sá sem hvarf) og hefur reynst mér mun betur en rándýrir símar frá Símanum. Ég kemst vel af án allra fídusa sem prýða þessa rándýru síma og finnst alveg nóg að hægt sé að hringja úr honum og í hann. Ég verð að vísu að viðurkenna að ég lét glepjast af nýjum og fínum gemsa áður en ég fór út. Nú get ég hlustað á útvarpið, Mp3 spilara, tekið myndir og vídeó ásamt fullt af öðrum hlutum sem ég á eftir að læra á. Svo er hann svo flottur á litinn, hvítur og limegrænn, það gerði náttúrulega útslagið um kaupin ha ha ha.

Morgunverður á Ítalíu

2008-06-30T22:48:00.002Z

Ég stóðst ekki mátið að setja inn þessa mynd af Kristínu við morgunverðarborðið. Við tíndum ávextina af trjánum í þessari paradís. Já og ástæðan fyrir því að við erum nokkrum kílóum þyngri eftir þessa ferð er maturinn hennar Ninu sem við "neyddumst" til að borða. Hún sendi okkur meira að segja heim með sína tertuna hver í farteskinu og ég get vottað það að ítalskt bakkelsi er það besta í heimi!!

Lolla á Ítalíu

2008-06-30T22:23:00.002Z

Já ég er komin heim í íslenska sumarið! Satt að segja þá kann ég bara vel að meta kulið í loftinu eftir molluna í Casalabate og það var ákveðin fró í því að finna kuldann nísta inn að beini eftir margra klukkutíma tónleika á laugardagskvöldið. Síðustu 3 dagarnir voru mér svolítið erfiðir þegar hitinn var kominn vel yfir 30°C enda hélt ég mig ýmist innandyra eða í skugganum þar til seinnipartinn en kvöldin voru best. Reyndar fékk ég líka nýtt nafn á Ítalíu en þar geng ég undir nafninu Lolla. Ástæðan fyrir því er að það er vonlaust fyrir Ítali að bera fram nafnið Guðlaug en þegar ég bauð þeim að nota Gulla í staðinn þá sló fyrst þögn á mannskapinn en síðan hófst mikil diskúsjón á ítölsku sem endaði með því að mér var tilkynnt að þau gætu bara alls ekki kallað mig RASS (eins og Gulla hljómar víst á ítölsku) því væru þau með þá tillögu að kalla mig Lollu sem ég samþykkti auðvitað umsvifalaust því hver vill vera kallaður RASS eða RASSA. Ég set fljótlega inn myndir á netalbúmið mitt, er búin að vera ægilega bissí eftir að ég kom heim, þurfti að skila af mér til Unnar Dísar í dag og hitti hana í fyrramálið að ræða framhaldið. Er líka með fullt hús af sófagestum í nokkra daga en þeir sjást nú bara snemma á morgnana og kvöldin.

Farin í sólina!

2008-06-12T04:33:00.001Z

til Ítalíu með Kristínu systur og Stefaníu Ósk. Kem aftur 26. júní, reyni að blogga eitthvað þaðan ef ég kemst einhvers staðar í netsamband. Verð að viðurkenna að mér finnst pínulítið erfið tilhugsun að vera ekki í reglulegu netsambandi. Ciao!!!!

Stöff í eyrað

2008-06-08T21:38:00.002Z

Ég á við þann vanda að stríða að önnur hlustin á mér stíflast svona einu sinni á ári. Það gerðist einmitt síðasta fimmtudag þannig að upphófust miklar hreinsunaraðgerðir sem báru ekki árangur fyrr en á föstudag. Ég held ég hafi verið búin að sprauta nokkrum lítrum af vatni í eyrað á mér áður en tappinn fór. Daníel benti mér á nýja aðferð sem er svokallað eyrnakerti. Ég sá þetta einhverntíman auglýst á einhverri snyrtistofu og var mikið búin að velta fyrir mér hvað í ósköpunum það væri. Að mér skilst er sérstakt kerti (held maður geti ekki notað gamalt jólakerti) sett yfir hlustina og svo er kveikt á því. Hitinn frá því bræðir víst allann merginn sem síðan lekur úr eyranu. Ég veit ekki mér líst ekki meira en svo á þessa aðferð, myndi sjálfsagt enda með að kveikja í hárinu á mér. Í staðinn keypti ég einhverja olíu sem sprautað er í eyrað reglulega og á að gera sama gagn. Við Daníel fengum okkur saman í eyrað á föstudagskvöldinu og það þrælvirkaði...gott stöff maður.

Kona á barmi taugaáfalls

2008-06-05T20:12:00.003Z

Ég er víst búin að vera ódugleg að blogga upp á síðkastið. Ástæðan er aðallega sú að það er bæði búið að vera mikið að gera hjá mér og svo er ég eiginlega á síðustu orkudropunum. Ég fékk skýringu í síðustu viku á því hvað gerðist hjá mér síðasta sumar þegar líkaminn gafst upp og ég gat ekki svo mikið sem haldið á vatnsglasi. Þetta var víst taugaáfall og þeir sem það hafa fengið segja mér að það geti tekið langan tíma að ná sér aftur. Þar sem ég gaf mér engan tíma til þess og var fljótlega aftur að drukkna í vinnu þá má ég víst þakka fyrir að vera ekki búin að fá annað áfall. Ég ákvað því að afþakka alla vinnu í júlí og ágúst og lifa á Kaupþing banka á meðan ég klára MA verkefnið mitt. Þannig að vonandi kem ég úthvíld og endurnærð frá Ítalíu í lok júní tilbúin í slaginn. Nú er bara vika í Ítalíu og dagarnir silast áfram ég hlakka svo til. Ég klára tvö síðustu námskeiðin næsta miðvikudag og stekk svo upp í næstu vél morguninn eftir.

Myndir og ljóð

2008-06-01T20:10:00.002Z

Í gær var opnuð ljósmyndasýning í Ljósmyndasafni Reykjavíkur. Það er sjálfur Viggo fagri Mortensen sem er með þessa sýningu. Ég ákvað að skella mér á opnunina, ekki bara í þeirri von að berja Viggo augum ef þið hafið haldið það! Sá honum reyndar bregða fyrir eitt lítið andartak. Svo mikil sveitamanneskja sem ég er þá átti ég engan vegin von á svona miklum áhuga fólks á sýningunni. Ég kom klukkan tvö og þá var komin löng biðröð af fólki og virtist meira en helmingurinn vera túristar sem þóttust sjálfsagt komast í feitt að komast á þessa sýningu. Sem betur fer stendur sýningin yfir fram í lok ágúst því það var varla nokkur möguleiki að skoða myndirnar fyrir öllu þessu kraðaki af fólki. Ég var eiginlega komin með smá innilokunarkennd og ákvað að koma frekar seinna þegar um hægist. Á leiðinni út kom ég við í afgreiðslunni þar sem verið var að selja ljósmyndabækur, ljóðabækur, plaköt o.fl. eftir kappann. Þar var svo sannarlega handagangur í öskjunni og afgreiðslukonurnar orðnar sveittar og rjóðar af því að sækja nýja og nýja kassa af bókum á 4.000 kall stykkið sem rifnar voru út af æstum aðdáendum. Ég rakst á gamla bók eftir hann með ljóðum og myndum á 1.500 kr og fjárfesti í henni, með bókinni fylgir diskur þar sem hann les sjálfur upp ljóðin og ég er að sjálfsögðu himinlifandi með þessi kaup. Ég sá nú samt enga ástæðu til að biðja um eiginhandaráritun enda hef ég aldrei skilið hvað er svona merkilegt við það að fólk kroti nafnið sitt á hluti. Annars er ég nokkuð ánægð með hann Viggo því allur ágóði af sýningunni rennur til Náttúruverndarsamtaka Íslands, hann er nefnilega svo ríkur að hann þarf ekkert á peningunum að halda. Þeir sem vilja styðja NÍ geta því fjárfest í ljósmynd á 30-35.ooo, bók eða plakati. Nú ætla ég að koma mér vel fyrir og hlusta á Aragorn fara með ljóð fyrir mig.

Samar á ferð

2008-05-29T21:09:00.003Z

Aldrei þessu vant þá fór ég í leikhús á þriðjudagskvöldið. Hér var á ferðinni samískur leikhópur með sýninguna "Sá hrímhærði og draumsjáandinn", alveg mögnuð sýning get ég sagt ykkur. Af einhverjum ástæðum þá var sýningin lítið auglýst en ég frétti af henni í gegnum þýska konu sem hafði samband við mig í gegnum sófagestasíðuna. Hana vantaði ekki sófa heldur hafði hún áhuga á að hitta mig í kaffi og spjall. Þessi mæta kona er hluti af leikhópnum (einskonar sviðsmaður) og býr í Lapplandi eða eins og hún sagði úti í skógi í Finnlandi þar sem búa um 20 hræður. Þetta er stutt frá landamærum Noregs og er leikhópurinn staðsettur Noregsmegin þannig að hún vinnur í Noregi. Hún sagði þetta þýða að hún þarf að vera með tvenns konar tíma í gangi, vekjaraklukkan er á norskum tíma svo hún mæti á réttum tíma í vinnuna og eldhúsklukkan er á finnskum tíma. Allavega þá endaði það með því að ég aðstoðaði við að ganga frá eftir sýninguna og fór svo út að borða með öllum hópnum og skemmti mér þvílíkt vel. Fínt að rifja upp norskuna í leiðinni. Það var nú samt svolítið spaugilegt að rölta upp Laugaveginn á leiðinni heim ásamt nokkrum blindfullum Sömum í fullum skrúða enda vorum við stoppuð af tveimur Ameríkönum sem vildu endilega taka mynd af þeim. Daginn eftir fór ég svo í bæjarrölt með Gerlinde meðan restin af hópnum fór á Gullfoss og Geysi. Þá uppgötvaði ég nýtt Gallerí í Aðalstræti (í gamla Fógetanum) þar sem finna má rjómann af íslenskri hönnun og handverki og mæli eindregið með að fólk líti þar við. Gerlinde mátti vart vatni halda yfir því sem þar var að sjá enda mikil handverksmanneskja sjálf og gullsmiður að mennt. Hún gaf mér hálsmen úr hreindýrshorni, eigin smíði að sjálfsögðu. Nú er ég sem sagt komin með sófa í Lapplandi þegar ég læt loksins verða af því að fara þangað en mig hefur lengi dreymt um það.

Góðir gestir

2008-05-23T21:30:00.004Z

Hjá mér eru góðir gestir frá Finnlandi og Álandseyjum. Robert og Jeanette eru hérna um helgina með Sunnu litlu og mömmu hans Roberts. Við Arja fórum í stutta skoðunarferð í morgun um Reykjavík og nágrannasveitarfélög en síðan drifu þau sig í hinn hefðbundna túristahring á Þingvöll, Gullfoss og Geysi. Ég er hæstánægð með að geta endurgoldið þeim gestrisnina frá því í Finnlandi bæði um daginn og fyrir 3 árum síðan. Ég heimsótti Örju líka á sínum tíma á Álandseyjum svo það er gaman að fá hana loksins í heimsókn. Hún er búin að vera ægilega spennt að komast til Íslands og var alveg í skýjunum í dag yfir öllu sem hún sá. Robert og Jeanetta voru að koma frá Kanada og ákváðu að stoppa hérna á heimleiðinni. Það var því hálfskondið í gærkvöldi klukkan 20 þá var Arja á finnskum tíma eða kl. 23 en þau hin á kanadískum tíma kl. 15 enda var Arja vöknuð fyrir allar aldir í morgun. Mér gengur bara ótrúlega vel að tala sænskuna en Jeanette er orðin nokkuð glúrin í íslenskunni enda búin að æfa sig heilmikið með íslenskuforriti. Robert heldur sinni íslensku við með því að hlusta á Rás 2 á netinu og lesa mbl.is og talar ennþá eins og innfæddur. Ég tala íslensku við Sunnu og svei mér ef hún skilur mig ekki bara alveg sú stutta.

Woofað í Vallanesi

2008-05-21T13:31:00.003Z

Ég hýsti þrjú systkini frá Bandaríkjunum í þrjár nætur. Þau voru búin að dvelja hjá Eymundi í Vallanesi í tvær vikur við svokallað woofing. Ég er einmitt nýlega búin að komast að því hvað það er. Þá dvelur fólk um lengri eða skemmri tíma á lífrænu býli sem sjálfboðaliðar við bústörfin og fær fæði og húsnæði í staðinn. Það var einmitt einhver Frakki að spyrjast fyrir á CS um býli til að woofa á, ég ætti kannski að benda honum á Eymund.
Ég sé að það er spáð 23 stiga hita fyrir austan um næstu helgi. Vonandi heldur spáin og bara svo þið vitið það þá er ég ekkert öfundsjúk enda styttist í Ítalíuferðina þar sem ég fæ örugglega nóga sól.
Ryksugan mín dó áðan!

Heim á ný

2008-05-17T21:43:00.002Z

Ég kom heim í gær með flóabit og illa lyktandi franskan ost í farteskinu. Mér varð það á að koma við í H & M áður en ég fór og missti mig aðeins í innkaupum. Við Minna fórum út að borða á kínverskan veitingastað síðasta kvöldið og fengum okkur svo kaffi á eftir í Torni þar sem er útsýni yfir borgina og nutum þess í kvöldsólinni. Ég var alveg búin á því þegar ég kom heim í gær og var sofnuð fyrir allar aldir enda enn á finnskum tíma sem eru þrír tímar á undan íslenskum. Ég reiknaði með að vakna í býtið í morgun en nei nei ég svaf í SAUTJÁN tíma. Maður verður alveg ótrúlega þreyttur af því að nota heilann svona mikið við að reyna að skilja hvað fólk er að segja. Nú skil ég nemendur mína vel. Næstsíðasta morguninn var heilinn á mér kominn á suðupunkt þegar ég ætlaði að taka lestina til Helsinki. Hún var að renna inn á brautarpallinn þegar ég kom á lestarstöðina og ég stökk upp í án þess að vera búin að tékka hvort ég væri á réttum brautarpalli. Þegar ég er sest rek ég augun í lítinn skjá sem á stendur Lipunmyynti og hrökk í kút. Guð ég er í rangri lest!! Ég ákvað því að fara út á næstu stöð og vera með það á hreinu að ég færi í rétta lest þó svo þessi virtist nú vera á réttri leið því hún stoppaði næst í Ilmala eins og Helsinki lestin gerir. Þegar næsta lest kom þangað settist ég og var nú með það á hreinu að ég væri í réttri lest. Sé ég þá ekki aftur lítinn skjá sem á stendur Lipunmyynti og rann þá upp fyrir mér ljós að þetta þýðir farmiðar sem ég vissi auðvitað mætavel það hafði bara eitthvað slegið út fyrir mér og ég ruglað þessu saman við Läppevära sem er lestin sem ég tók alltaf heim. Heilinn var hreinlega kominn á yfirsnúnig enda hafði ég verið að fylgjast með kennslu til 6 deginum áður.

Lagkökur í massavís

2008-05-12T18:14:00.003Z

Ég fór í langt ferðalag í gær að heimsækja mömmur Minnu og Juhani í tilefni mæðradagsins. Hér í Finnlandi er mæðradagurinn mjög stór og á föstudag og laugardag var mikið að gera í búðum því allir voru að kaupa gjafir fyrir mæður sínar. Við byrjuðum á að keyra klukkutíma norður af Helsinki til mömmu hans Juhani og fengum kaffi og köku þar. Síðan var farið enn norðar og lengst út í sveit til mömmu hennar Minnu. Ég heilsaði upp á kýrnar og hestana en þau eiga tvo íslenska hesta og nokkra smáhesta (ponys) sem eru ægilega krúttlegir sérstaklega folaldið. Kisan þeirra er með vikugamla kettlinga og svo eru þrír hundar. Eftir mat var lagkaka og kaffi og svo var haldið til ömmunnar og gúffað í sig meiri kökum og kaffi. Á bakaleiðinni tókum við svolítinn krók og kíktum við á sumarhús sem Minna og Juhani eru að spá í að kaupa. Þrátt fyrir allan þennan akstur í gær þá sá ég lítið annað en tré og aftur tré og svo glitti í hús og vötn inni á milli trjánna. Þetta var samt mjög skemmtilegur dagur og gaman að hitta allt þetta fólk og njóta góða veðursins. Í kvöld fórum við svo út að borða á taílenskan veitingastað. Á morgun verður langur dagur hjá mér. Mæti í Adulta klukkan 9 og verð til 6. Nú ætla ég að skríða í bólið er ennþá lúin eftir ferðalagið í gær.

Skómanía

2008-05-10T17:29:00.002Z

Við Minna eyddum deginum í skóleit enda er ég búin að bíða eftir því að komast til Helsinki að kaupa mér nýja skó. Ég keypti bestu skó í heimi þegar ég var hér síðast fyrir þremur árum og hugsaði mér gott til glóðarinnar að bæta öðru pari við. Mér til mikillar gleði er heilmikið úrval hér af skóm frá El Naturalista (uppáhaldsmerkið mitt), Fly og Art. Í dag keypti ég tvö pör og ætla að kaupa eitt í viðbót eftir helgi. Verst að evran virðist hækka dag frá degi. Það var svo heitt í dag (yfir 20 stig) að við gáfumst upp á búðarrápinu og skjögruðum heim með lafandi tungu. Ætlum að liggja í leti og horfa á DVD í kvöld. Í fyrramálið er stefnan tekin út í sveit í heimsókn til fjölskyldunnar hennar Minnu.

Minä olen Gulla

2008-05-09T14:17:00.003Z

Enn einn góður og sólríkur dagur hér í Helsinki. Ég var mætt í Tikkurila klukkan níu að fylgjast með kennslu til klukkan hálfþrjú og fékk fullt af áhugaverðum punktum sem ég get nýtt mér í minni kennslu. Núna er ég komin í helgarfrí og ætla að skreppa í bæinn á eftir og fá mér að borða. Minna og Juhani eru að fara á upplestur á leikriti eftir vinkonu þeirra en ég sé engan tilgang í því að fara með og skilja ekki bofs. Ég bætti samt heilmikið við orðaforðann minn í dag. Reyndar er já á finnsku kyllä sem er borið fram eins og Gulla þannig að mér finnst ég alltaf vera að heyra einhvern segja nafnið mitt.
Í gærkvöldi fórum við á nýjan nepalskan veitingastað og fórum svo í langan göngutúr meðfram ströndinni í yndislegu veðri ásamt Jussi vini þeirra. Þetta gæti ekki verið betra.

Sól og sumar í Helsinki

2008-05-08T13:56:00.002Z

Það er að verða komin vika frá því ég kom hingað til Helsinki og ég er orðin nokkuð heimavön bara í borginni. Ekki byrjaði ferðin samt vel því fyrstu nóttina fékk ég ælupest og ældi eins og múkki alla nóttina. Síðan missti ég meðvitund og svaf í eina 30 tíma þannig að helgin fór að mestu leyti í súginn eins og það var nú gott veður 20 stiga hiti og sól. Reyndar get ég ekki kvartað yfir veðrinu í vikunni það er búið að vera ágætis reykvískt sumarveður. Spáin um helgina er svo bongóblíða og ég er að spá í fara og skoða Suomilinnen/Sveaborg og eyða sunnudeginum þar.
Ég er búin að læra nokkur orð í finnsku og get orðið boðið góðan dag og sagt afsakið. Annars er búið að vera mjög áhugavert að fylgjast með kennslunni hérna og í næstu viku ætla ég að fókusa sem mest á kennslu fyrir ólæsa. Ég verð duglegri að blogga á næstunni því nú er ég komin í gott netsamband með mína tölvu. Læt þetta duga í bili því við Minna erum að fara í bæinn að dingla okkur. Moj moj!

Mínar 15 mínútur af frægð

2008-04-19T21:29:00.009Z

Ég er bara orðin "heimsfræg" í Bandaríkjunum, nánar tiltekið í Keene í New Hampshire. Það er greinilegt að ég verð að láta sjá mig á næstu Graskerjahátíð í Keene, ja það stendur a.m.k. í greininni að ég ætli að mæta ha ha ha. Matt sagði líka að nú kæmist ég ekki hjá því fyrst það væri komið á prent. Það er allavega ekki spurning að ég á eftir að skreppa í heimsókn til Alaska einn daginn enda búin að fá tvo sófagesti þaðan. Reyndar lítur í viðtalinu út eins og ég hafi verið á þönum í kringum þau sem var svo sannarlega ekki. Eitthvað hefur líka skolast til hjá blaðamanni því ég kannast ekki við að hafa kynnt þau fyrir einhverjum hljómsveitarmeðlimum. Ég skrapp með þeim á tónleika á Organ af því mig langaði að sjá og hlusta á Eivöru og Matt hitti hana svo á hátiðinni Aldrei fór ég suður og spjallaði eitthvað við hana. Hann var mjög uppnuminn yfir því hversu alþýðlegar íslenskar/færeyskar poppstjörnur eru. En það var allavega mjög gaman að hafa þau og við höldum sambandi á Facebook.

P.S: Linkurinn virkar víst ekki lengur nema fyrir þá sem eru áskrifendur :-(
þannig að mínar 15 mínútur eru greinilega liðnar ha ha ha ha

Hárvöxtur

2008-04-18T12:26:00.004Z

Keren sófagesturinn minn frá Tel Aviv benti mér á einn kost við að búa á Íslandi sem ég hafði ekki hugmynd um. Minni HÁRVÖXTUR!! Hún sagðist hafa tekið eftir því að dregið hefði verulega úr hárvextinum á fótleggjunum eftir að hún kom til Íslands og taldi ástæðuna vera kuldann hér á landi. Hitinn í heimalandi hennar gerir það víst að verkum að þrem dögum eftir að hún vaxar á sér leggina eru þeir aftur orðnir eins og á velhærðum hobbita. Þær tvær vikur sem hún var hér á landi var sprettan hins vegar nánast engin.
Það er upplagt fyrir mig að fá þessa kenningu staðfesta þegar ég fer í hitasvækjuna á Ítalíu.

Matarlyst

2008-04-16T11:05:00.002Z

Um síðustu helgi eldaði ég tvö lambalæri og bauð öllum strákahópnum í mat ásamt Ellen kærustunni hans Vals. Að sjálfsögðu tóku allir rösklega til matar síns og ekki síst hún Ellen sem borðaði þá alla undir borðið. Viðbrögð þeirra við því minnti mig á viðbrögð Skúla Björns þegar ég var að vinna í skógræktinni og borðaði fleiri kjötbollur en hann. Það virðist nefnilega vera ákveðið karlmennskumerki að borða mikið og sú karlmennska bíður hnekki við það að vera borðaður undir borðið af konu. Annars var alveg ótrúlegt hvað ég og eiginlega við systur allar gátum innbyrt af mat á okkar yngri árum. Kolbrún man örugglega enn eftir því þegar Hói á Víðivöllum sagði við hana “ertu með orma eða hvað” þegar hún var búin að úða í sig ótæpilega af skyrsúpunni hennar Ingu ræst. Það hefur sennilega verið sæmilegur matarreikningurinn hjá foreldrum okkar miðað við það að ég tók alltaf 10 brauðsneiðar með í nesti og ég man ekki betur en Stína systir hafi verið með svipaðan skammt. Það er af sem áður var, núna má maður bara þakka fyrir að narta í tvær hrökkbrauðssneiðar.

Japanskur fótbolti

2008-04-12T19:13:00.001Z

Ég grenjaði úr hlátri yfir þessu myndbandi!!

Geitin Skotta

2008-04-12T19:08:00.003Z

Vinkona mín gaf mér þessa fallegu gulu gerberu í gær. Þegar ég kom fram í morgun sá ég mér til skelfingar að búið var að éta hana upp til agna. Það er að segja gula blómið. Ég hélt það væru bara geitur sem höguðu sér svona!!

Stopp stopp stopp!!

2008-04-07T15:15:00.002Z

Fyrir viku síðan gerðist það að öll viðvörunarljós tóku að blikka í líkamanum á mér. Minnug þess að hafa virt þau að vettugi síðasta sumar með þeim afleiðingum að ég varð eins og nírætt lasburða gamalmenni, þá ákvað ég að taka mark á þeim núna. Það voru samt þung sporin til leiðbeinandans míns að fresta útskrift enn einu sinni. Mér finnst þetta auðvitað algjör aumingjaskapur. Ég fékk bara jákvæðar viðtökur því eins og hún sagði þá skiptir ekki nokkru máli fyrir mig hvort ég útskrifast í vor eða haust. Þannig að núna er ég byrjuð að undirbúa Finnlandsferð í byrjun maí. Ég er að fara á námskeið á vegum Alþjóðahúss í tvær vikur að læra að kenna íslensku sem annað mál. Mér skilst að ég eigi að læra finnsku þessar tvær vikur og er ægilega spennt. Eins og er þá er ég að kenna þrjú íslenskunámskeið en eitt þeirra klárast næsta fimmtudag. Nú er bara að halda dampinum í ritgerðarskrifum, ég tók samt frí frá því í síðustu viku til að safna aftur kröftum.
Ég vissi ekki að kettir fengju flensu. Scarlet ræfillinn er með flensu og er búin að hnerra út í eitt síðustu daga og nætur. Svo vellur gröftur úr augunum á henni þannig að ég er í hjúkrunargírnum og þvæ augun nokkrum sinnum á dag. Ákvað í dag að prófa að nota fjallagrasaseyði til að strjúka yfir augun því ég hef tröllatrú á þeim grösum og veit að þau eru bakteríudrepandi. Sem betur fer er kattaflensan víst ekkert hættuleg. Skotta var með þetta um daginn en hún fékk ekkert í augun heldur hnerraði bara stanslaust og nuddaði á sér nefið. Scarlett er náttúrulega orðin fjórtán ára þannig að hún verður miklu lasnari, er ósköp orkulítil en sem betur fer er hún með fína matarlyst. Skottu hundleiðist að geta ekki fengið hana til að leika við sig og sýnir lítinn skilning á veikindum þeirrar gömlu.
Vel á minnst. Vorið er komið!! Það var vorlykt þegar ég kom út í morgun og nefið á mér klikkar aldrei þegar kemur að árstíðaskiptum þ.e.a.s. vor og haust.

Sorg í hjarta

2008-03-30T12:06:00.002Z

Mamma hringdi í mig í morgun með þá sorgarfrétt að hann Biggi Dúnu hefði dáið í vélsleðaslysi í gær. Mér finnst erfitt að trúa þessu það er svo stutt síðan ég hitti þau Birnu í Kringlunni og fékk hlýtt faðmlag frá þeim báðum. Ég kynntist Bigga og Birnu vel fyrir 24 árum síðan og þau eru eitt það yndislegasta fólk sem ég þekki. Það alltaf hefur verið svo gott að koma í heimsókn til þeirra og fylgjast með hvað krökkunum þeirra gengur vel. Ég var búin að hlakka til að koma við hjá þeim í sumar og fá mér kaffi og spjall í notalega garðinum þeirra. Á morgun átti að jarða hann Villa Rúnar bróður hans en nú verða þeir bræður sennilega jarðaðir samtímis. Elsku Birna mín ég samhryggist þér og börnunum þínum svo innilega að mig skortir orð. Ég sit hér og hágræt ég finn svo til með ykkur. Guð gefi ykkur styrk að takast á við sorgina og ég læt bænina okkar fylgja.

Guð gefi mér æðruleysi
til að sætta mig við það sem ég fæ ekki breytt
Kjark til að breyta því sem ég get breytt
og vit til að greina þar á milli

Upprennandi veiðikló

2008-03-23T15:15:00.002Z

Allar þessar músaveiðaæfingar heimasætunnar Skottu virðast hafa borið árangur. Í gær fékk hún stóran páskaunga (ekki alvöru) til að leika sér að og tók það greinilega mjög alvarlega því í morgun voru gular fjaðrir út um alla stofu. Það er greinilegt að ég verð að setja á hana kúabjöllu þegar hún fær loksins að fara út úr húsi ef hún á ekki að hreinsa hverfið af fuglum. Mér varð hugsað með skelfingu til þess ef þetta hefði nú verið alvöru fugl sem hefði fengið þessa meðferð í stofunni hjá mér. Það hefði sjálfsagt þýtt allsherjar hreingerningu á húsgögnum, veggjum og gólfum eftir blóðslettur og fiður. Vonandi kennir frú Scarlett henni góða siði þegar þar að kemur enda hefur hún aldrei veitt svo mikið sem ánamaðk öll þau 14 ár sem hún hefur lifað.
Í gær var danskt pönnukökuboð hér í Einholtinu. Málfríður, Ingileif og Sigurbjörg voru hér með sína dönsku ektamaka og fríðan barnahóp. Birna og Sirrý slógust líka í hópinn. Aldeilis gaman að fá svona sjaldséða gesti í heimsókn.

Hland fyrir hjartað

2008-03-18T14:54:00.005Z

Ég fékk aldeilis hland fyrir hjartað í dag þegar röddin hjá Símanum sagði mér að ég yrði mögulega bæði net- og símalaus um Páskana. Þarna sést hvað ég er orðin háð þessari tækni, annars hef ég það mér til afsökunar að ég þarf að nota netið þegar ég er að vinna í MA verkefninu mínu. Ég var í miðju kafi að vinna og nota mikið ordabok.is sem þýðir að ég verð að vera nettengd. Allt í einu dettur netið út og þá meina ég ekki bara þráðlausa netið. Þegar ég tók upp heimasímann til að hringja þá var hann líka dauður. Ég hringdi því í þjónustunúmer Símans og rakti raunir mínar fyrir röddinni. Þetta var svo svarið sem ég fékk og ég get svarið það ég hreinlega fylltist skelfingu við tilhugsunina um netlausa Páska. Sem betur fer reyndist þetta vera bilun á símalínunni sem var snögglega kippt í lag og ég tók gleði mína á ný. Annars gruna ég sprengjuvargana hinum megin við götuna um að eiga einhvern hlut að máli. Þeir hafa sprengt eins og óðir í dag og rétt áður en netið datt út kom þvílík bomba að húsið hreinlega nötraði.

Bílaviðgerðir og bróderingar

2008-03-14T11:41:00.002Z

Bíllinn fór ekki í gang síðasta mánudagsmorgun. Á ég ekki að kíkja á hann fyrir þig spurði Prim, 22ja ára ástralski sófagesturinn minn (kona N.B.). Þegar ég kom heim aftur frá því að kenna var hún búin að gera við bílinn fyrir mig!!! Þessi frábæra stelpa er sveitastelpa sem hefur flakkað um heiminn og m.a. búið eitt ár á Hawai á búgarði þar sem hún vann við að temja hesta. Hún vann líka 6 mánuði á búgarði í Texas. Núna er hún á leiðinni til Rússlands, Hvíta-Rússlands og Úkraínu, ekki þó til að temja hesta.
Í gær kom alveg óskaplega krúttulegt par frá Boston. Þau eru tvítug og þegar þau voru búin að koma sér fyrir þá dró hún upp hringlaga útsaumsramma og sat við að bródera í gærkvöldi. Í dag á svo að skoða það sem Reykjavík hefur upp á að bjóða en ég ætla að elda fisk handa þeim í kvöld. Kosturinn við að hafa sófagesti er að ég elda handa mér, ég nenni ekki að elda ofan í mig eina enda kann ég ekki að elda fyrir eina manneskju. Svo hér verður boðið upp á karrýfisk sem alltaf slær í gegn og er þar að auki alveg óskaplega fljótlegur réttur. Það er munur að fá frían gæðafisk frá syninum.

Afvelta af ofáti

2008-03-06T19:54:00.003Z

ÆÆÆÆ og ÓÓÓ!!!!! Hvaða árátta er það eiginlega hjá manni að þurfa alltaf að klára af diskinum þegar maður fer út að borða. Ég ligg hér afvelta nánast með hljóðum af að troða í mig fullum diski af frábærum mexíkóskum mat í boði Hrefnu systur. Við fórum á nýjan stað sem heitir Tabasco og ég mæli svo sannarlega með honum. Bæði umhverfi, þjónusta og matur hreint út sagt frábært. Þessi veitingastaður er við Ingólfstorg í sama húsi og Victor nema gengið inn í hann Ingólfstorgsmegin. Annars held ég þessi árátta sé arfleifð frá því maður var krakki og átti alltaf að klára af diskinum sem er náttúrulega algjör vitleysa því þá hættir maður að taka mark á því þegar maður er saddur og venur krakkana á að halda áfram eftir að maginn segir stopp.

Skotta er aftur að breima. Hér læddist einhver fressköttur inn og skvetti smávegis hormónum á ryksuguna frammi á gangi. Þær fósturmæðgur þefuðu af glaðningnum og það var eins og við manninn mælt. Táningurinn umturnaðist og liggur mænandi út um gluggann á milli þess sem hún skríður vælandi um gólfið mér til mikilla leiðinda.

Dönsku sófagestirnir mínir þrír eru komnir aftur og eru búin að koma sér fyrir í bláa herberginu. Ósköp notalegt að hafa þau hérna og það verður víst eldað ofan í mig annað kvöld og að sjálfsögðu vaskað upp líka. Algjör lúxus. Ég sit bara við tölvuna að berja saman einhvern texta og er búin að koma mér upp fínni vinnuaðstöðu hérna í stofunni.

Glöð í hjarta

2008-03-04T18:05:00.002Z

Ég var að útskrifa einn íslenskuhópinn minn í dag og þessar elskur voru búin að slá saman í blómvönd og nammiegg handa mér. Svo spurðu þau hvort ég myndi ekki örugglega kenna framhaldsnámskeið fyrir þau og ég varð svo glöð að heyra hvað þau eru áhugasöm. Þetta er alveg ótrúlega gefandi starf. Næsta mánudag byrjar svo nýtt byrjendanámskeið hjá sama fyrirtæki. En nú þarf ég að nýta tímann og vinna í verkefninu mínu. Knús á línuna!!

Kátt í koti

2008-03-02T20:23:00.003Z

Hér er aldeilis búið að vera kátt í koti alla vikuna. Sigurbjörg og fjölskylda eru í heimsókn og í nógu að snúast hjá mér. Í gær var opið hús hjá mér fyrir stórfjölskylduna og ég bakaði 5 uppskriftir af pönnukökum. Síðan fékk ég að passa Freyju um kvöldið og nóttina mér til mikillar gleði. Ég verð samt að viðurkenna að ég er ósköp fegin að þurfa ekki að vakna um miðjar nætur í barnastúss á hverri einustu nóttu. Þetta gekk eins og í sögu hjá okkur frænkum en Sunneva var mér nú líka til halds og trausts. Eiginlega svaf sú stutta meira og minna milli þess sem hún nærði sig. Hún vaknaði nú samt eldhress í morgun og brosti sínu blíðasta og hjalaði við mig. Eins og fleiri í fjölskyldunni þá ætlar daman ekki að verða mikill morgunhani sem er fínt á þessum aldri en verra þegar unglingsárin skella á eins og ég hef mikla persónulega reynslu af. Ætlar því miður seint af rjátlast af mér sjálfri.

Einkasápan heldur áfram

2008-02-23T19:40:00.002Z

Uppáhalds sófagestirnir mínir eru búin að vera hjá mér í tvo daga mér til mikillar ánægju. Nú styttist í að sá ítalski hverfi á braut úr faðmi þeirrar þýsku í faðm þeirrar ítölsku (held ég). Síðustu dagana ákváðu þau að nota í skoðunarferð um Suðurland og leigðu smábíl í ferðina. Þau eru búin að vera dugleg að þvælast um Norðurland og Vesturland á puttanum og þykir mér það heilmikið afrek hjá þeim á þessum árstíma. Við áttum góða stund saman í gærkvöldi þar sem þau færðu mér forláta tebolla að gjöf og með fylgdi póstkort sem þau ákváðu að færa mér í eigin persónu frekar en að nota íslensku póstþjónustuna. Við gæddum okkur svo á tiramishu sem Franziska bjó til fyrr um daginn og var víst ekki alveg eins og það átti að vera en mér fannst það nú bara fínt, soldið þurrt en við helltum bara kaffi yfir og þá var það allt í lagi. Æ þessar elskur það var svo yndislegt kortið frá þeim og ég á eftir að sakna þeirra mikið. Einhver plön virðast vera í gangi hjá þeim um að hittast á Ítalíu í nánustu framtíð þannig að nú veit ég ekkert hver staðan er með þá sem heima situr í festum. Það virðist því ætla að vera framhald á sápuóperunni.

Pólsk töframixtúra

2008-02-19T20:34:00.002Z

Ég var með pólskan sófagest um síðustu helgi sem gaf mér uppskrift sem mamma hans bjó alltaf til þegar einhver fékk kvef eða flensu. Þú sneiðir eða saxar hvítlauksgeira og setur í hunang. Lætur standa á hlýjum stað í sólarhring og tekur svo eina teskeið tvisvar á dag. Ég bætti að vísu við sneið af engiferrót til að gera þetta öflugra. Ég ákvað sem sagt að prófa þetta í staðinn fyrir pensilín og það bara svínvirkar. Ég er laus við hóstann og orkan öll að koma og þó fór ég að kenna bæði í gær og dag. Í fyrramálið tek ég svo aftur til við skriftir enda ekki seinna vænna.